2025 жылғы 1 ақпандағы жағдай бойынша жұмыспен қамтуға жәрдемдесудің белсенді шараларымен 49,7 мың қазақстандық қамтылды. 46,9 мың адам жұмысқа орналасса, оның 16,6 мыңы тұрақты жұмыспен қамтылды.
Субсидияланатын жұмыс орындарына 30,3 мың адам жұмысқа орналастырылды, оның ішінде: 1,3 мыңы әлеуметтік жұмыс орындарына; жастар тәжірибесі бойынша – 921 адам; қоғамдық жұмыстарға – 25,9 мың; «Күміс дәуір» жобасы аясында – 2,2 мың адам.
Еңбек нарығында сұранысқа ие мамандықтар бойынша онлайн оқыту 8,3 мың жұмыссызды қамтыды, олардың 7,6 мыңы оқуды аяқтады.
Сондай-ақ, «Бастау Бизнес» жобасы бойынша кәсіпкерлік негіздеріне оқытумен 2,8 мың адам қамтылса, оның 1,3 мыңы оны аяқтап, сертификат алды.
Қызмет саласын таңдау мақсатында 31 мың адам әлеуметтік кәсіптік бағдарлаудан өтті.
Сонымен қатар, 2025 жылы халықтың әлеуметтік осал санаттарына жаңа бизнес-бастамаларды жүзеге асыру үшін 400 АЕК-ке дейін (1 572 800 теңге) 9 мың грант беру жоспарлануда.
