9 жылға жуық құлдық: Қарағандыда мүгедектігі бар ер адам мен оның әйелін қайыр сұрауға мәжбүрлеген ер адам сотталды
Ерлі-зайыптылар жаңа туған қыздарын ер адамның рұқсатымен ғана көрген. Қарағандыда жергілікті екі тұрғынды қанау мақсатында қылмыстық топ құрған азаматқа үкім шықты. Ол оларды тоғыз жылға жуық қайыр сұрауға мәжбүрлеп, тапқан ақшасын түгел тартып алып отырған, деп хабарлады облыстық соттың баспасөз қызметі. 2015 жылдың қаңтарында сотталушы сауда орталығының жанында қайыр сұрап жүрген екі жәбірленушіні – мүгедектігі бар ер мен әйелді байқаған.
Сотталушы күш көрсетіп, қорқытып, жәбірленушілерді өзіне жұмыс істеуге – «45-квартал» аялдамасы маңында қайыр сұрауға мәжбүрлеген. Ерлі-зайыптылар тапқан ақшасының барлығын қылмыскерге беріп келген. 2020 жылы сотталушы жәбірленушілерге Ақтас ауылынан пәтер берген. Ол үйде ерлі-зайыптылардың қызы дүниеге келген. Ер адам қызды тәрбиелеу үшін әпкесінің қолына беруге мәжбүрлеген. Әйел ағасының қылмыстық ниетінен күдіктенбегені атап өтілді.
Жәбірленушілер баласын сотталушының рұқсатымен ғана көрген, ол қыздарының туу туралы куәлігін тартып алып, талаптары орындалмаса, оларды ата-аналық құқығынан айырамын деп қорқытқан. Жәбірленушілер сотталушыға 2015 жылдың қаңтарынан 2023 жылдың желтоқсан айына дейін «жұмыс істеген» және оған күн сайын 20 мың теңгеден 40 мың теңгеге дейін ақша беріп отырған. 2023 жылдың желтоқсанында ер адам тағы бір қылмыс жасады деген күдікпен қамауға алынды. Алайда тергеу изоляторында отырғанның өзінде қайыр сұрау бойынша нұсқау беріп келген.
Құқық қорғау органдары анықтамаған телефон арқылы сотталушы жиені мен оның күйеуіне, сондай-ақ танысына нұсқау беріп отырған. Қорқыту арқылы олар зардап шеккендерді тағы бес ай қайыр сұрауға мәжбүрлеген. Барлық жиналған қаражат автонесие бойынша ай сайынғы төлемді өтеуге, олардың жеке қажеттіліктеріне және жауапкердің түрлі өтініштеріне жұмсалған.
Сот қылмыстық топты ұйымдастырушыны 17 жылға, оның сыбайластарының әрқайсысын 12 жылдан бас бостандығынан айырды. Жәбірленушінің пайдасына 6 млн теңге өндірілді.
Үкім заңды күшіне енген жоқ.
