Павлодарда даму ерекшеліктері бар балаларға төленетін әлеуметтік төлемдерге қатысты түсінбеушілік орын алды.
Әлеуметтік желілерде мүгедектігі бар балаларды тәрбиелеп отырған ата-аналардан қайта есептеліп, артық төленген әлеуметтік төлемдерді қайтару талап етілгені туралы ақпарат тарады.
«Павлодар қаласында төлем алушылардың тізімі қалыптастырылатын «Е-Собес» ақпараттық жүйесінде техникалық ақау орын алды. Ақау жергілікті сипатта болды және Қазақстанның басқа өңірлеріне әсер еткен жоқ», – деп хабарлады сәрсенбі күні Павлодар қаласының әкімдігі.
Қала әкімдігінің мәліметінше, Республика күніне орай мүгедектігі бар балаларды тәрбиелеп отырған отбасыларға бұрын қолданыста болған қағидалар бойынша әлеуметтік төлемдер есептелген. Ол кезде көмек отбасындағы мүгедектігі бар әр балаға жеке-жеке тағайындалатын.
Алайда 2026 жылғы сәуірден бастап жаңа қағидалар күшіне енді. Оған сәйкес, отбасындағы мүгедектігі бар балалардың санына қарамастан, 25 АЕК мөлшерінде, яғни 108 125 теңге көлемінде бір ғана төлем көзделген.
Дегенмен «Е-Собес» жүйесіндегі техникалық ақауға байланысты отбасындағы мүгедектігі бар әр балаға төлемдерді есептеуді жалғастырды.
«Негізсіз төлемдер болған жоқ, сондықтан бюджет қаражатын қайтару талап етілмейді. Барлық отбасы бекітілген бюджет шеңберінде өздеріне тиесілі төлемдерді алды. 2027 жылдан бастап төлемдер жаңа қағидаларға сәйкес жүргізіледі», – деп толықтырды қала әкімдігі.
