Шетелдегі қазақстандықтарға Egov.kz «электрондық үкімет» порталында бес жаңа қызмет қол жетімді, деп хабарлайды Қазақстан Республикасы Сыртқы істер министрлігі.
«Еліміздің аумағынан тыс жерлерде тұратын Қазақстан азаматтары енді Egov.kz интернет-порталының көмегімен некеге тұру немесе бұзу, тууды, қайтыс болуды тіркеу, аты-жөнін, тегін, әкесінің атын ауыстыру үшін құжаттарды ұсына алады. Тиісті шетелдіктерден хабарлама алғаннан кейін Өтініш беруші акт жазбаларын тіркеу туралы Қазақстанның шетелдегі елшілігінде немесе консулдығында дайын куәлік алуы керек. Бүгінгі таңда мұндай мүмкіндік әлемнің 20-дан астам нүктесінде бар», — делінген хабарламада.
Қызметтерді «Ұлттық ақпараттық технологиялар» АҚ және Цифрлық даму, инновация және аэроғарыш өнеркәсібі министрлігі ҚР Сыртқы істер министрлігімен және Әділет министрлігімен бірлесіп жүзеге асырғаны атап өтілген.
Egov.kz порталының «Отбасы» бөлімінде неке қиюды немесе бұзуды мемлекеттік тіркеу үшін тиісті қызметті тауып, қажетті бағандарды толтырып, консулдық алым төленгені туралы түбіртекті жүктеу қажет, содан кейін өтінімге ЭЦҚ немесе SMS паролін қолдану арқылы қол қою керек. Содан кейін ерлі-зайыптылардың біреуінің жеке кабинетіне өтінішті мақұлдау қажеттілігі туралы хабарлама жіберіледі. Ол қажетті ақпаратты толтырады және өтінімге қол қояды. Қызметтің мерзімі — 1 ай.
Шетелде баланың туылуын тіркеу үшін пайдаланушы қажетті ақпаратты толтырып, қажет құжаттарды, консулдық алымның төленгенін растайтын түбіртекті жүктеп, өтінімге қол қоюы керек. Қызмет көрсету мерзімі — 3 жұмыс күні. Атын, тегін, әкесінің атын өзгерту үшін дәл сол әрекеттерді жасау керек, бірақ қызмет мерзімі 30 күнтізбелік күнді құрайды.
Қайтыс болуды тіркеу кезінде қайтыс болған адамның ЖСН-ін көрсетіп, қажетті ақпаратты толтырып, өтінімге қол қою қажет. Қызмет 1 жұмыс күні ішінде ұсынылады.
