Жамбыл облысының әкімі Бердібек Сапарбаевтың төрағалығымен өткен отырыс барысында тілдерді дамыту және ономастика мәселелері талқыланды.
Аймақ басшысының баспасөз қызметі облыста мемлекеттік тілді білетін ересек тұрғындардың үлесі 91,9 пайызды, қазақ тілінде сөйлей, оқи және жаза алатын халықтың үлесі 70,5 пайызды құрайтындығын атап өтті. Тілдерді дамыту бөлімінің бастығы Рахия Тұрмаханбетова орыс тілінде сөйлейтін халықтың үлесі 93,5 пайызды, ағылшын тілі 27,7 пайызды, үш тілде 27,8 пайызды құрайтындығын айтты.
Мемлекеттік органдарда құжаттама толығымен дерлік (99,2 пайызда) мемлекеттік тілде жүргізіледі. «Статистика әлі көңіл көншітпейді. Нәтижеге жету үшін тиімді жұмыс істеу қажет. Егер аймақ тұрғындары үш тілді білсе, онда олардың алдында үлкен мүмкіндіктер ашылады. Азаматтар Қазақстанның мемлекеттік тілін білу қажеттілік екенін түсінуі керек. Ересек жандар балаларына үлгі көрсетіп, қазақ тілінде өздері сөйлесуі керек, тағы бірнеше тілдерді меңгеруге ұмтылуы керек», — деді Бердібек Сапарбаев.
Өткен жылдан бері Қордай өңірінде Сөйле клубы мемлекеттік тіл курстарын ұйымдастырып келеді. Сабақтар ашық аспан астында өтеді.
«Осындай курстар облыс орталығында және барлық аудандарда ұйымдастырылуы керек. Балалар жазғы демалыстарын барынша пайдалы өткізуі керек», — деп тапсырды облыс әкімі.
Тілдерді оқыту орталығының қызметкерлері өткен жылы 2385 азаматқа қазақ тілін оқытты, оның 94 пайызы түрлі этнос өкілдері. Биыл 4000 тыңдаушыны қамту жоспарланған.
Сонымен қатар кездесуге қатысушылар ономастика саласындағы мәселелерді талқылады. Рахия Тұрмаханбетованың айтуынша, тоғыз елді мекеннің атауын ауыстыру керек, топонимикалық жүктеме көтермейтін 563 көше атауы идеологиялық тұрғыдан ескірген, атауы жоқ 13 көше, есімдері жиі қайталанатын 20 көше бар. Аймақ басшысы кездесуге қатысқан облыс әкімдеріне бейнеконференция байланысы арқылы бұл мәселені бақылауға алуды тапсырды.
«Республикалық ономастикалық комиссия Тараздағы 29 көшеге жаңа атаулар берді. Комиссия қазір 40 мектептің атауын өзгерту туралы ұсыныстарды қарастыруда, оның ішінде Жалпақтөбе ауылындағы Мәдениет үйіне композитор Шәмші Қалдаяқовтың есімін беру керек», — деп қосты Рахия Тұрмаханбетова.
«Қоғамдық тіл инспекциясы» жобасы аясында рейдтер жүргізіліп жатқанын, оның барысында жарнамалық тақтайшалардағы, билбордтардағы және басқа да көрнекі ақпарат объектілеріндегі қателіктер түзетіліп жатқаны айтылды.
«Ономастика — бұл маңызды мәселе. Заң нормаларын басшылыққа алу қажет. Елді мекендердің атаулары терең мағынаға ие болуы керек. Біз көшелерімізге ауданымыздың дамуына ерекше үлес қосқан адамдардың атын беруіміз керек. Жамбылдықтар екі мәрте Социалистік Еңбек Ері атанған Жазылбек Қуанышбаевты мақтан тұтады. Тараздың үлкен көшелерінің біріне оның есімі берілуі керек. Жас ұрпақ осындай ұлы адамдар туралы білуі керек», — деп сөзін түйіндеді облыс әкімі.
