Австрияда зағиптар мен нашар көретін жандарға арналған «ақылды» аяқ киім шығарылды. Аяқ киімге төрт метрге дейінгі кез келген кедергілерге жауап беретін арнайы датчиктер орнатылған.
Құрылғы сенсорлар жаяужолда жатқан тасты немесе биік жиектемені «көргеннен» кейін ұялы телефонға діріл сигналын немесе дыбыс жібереді. Мұндай «ақылды» аяқ киімдегі зағип жандар енді таяқшаны қолданбайды. Қазір ноу-хауды жасаушылар оны жетілдіруге күш салуда. Өндірушілер камера мен жасанды интеллектті аяқ киімге біріктіруді жоспарлап отыр. Бұл кедергілердің сипатын одан әрі тануға көмектеседі. Бір «ақылды» аяқ киімнің құны шамамен 3800 еуроны құрайды.
Ақылды аяқ киімді ойлап тапқан Маркус Раффер:
— Мен өзім кішкентай кезімнен нашар көретінмін. Мен осы проблемамен бірге өстім және көптеген әртүрлі құрылғыларды сынап көрдім. Бірақ олардың ешқайсысы маған сәйкес келмеді. Ақылды аяқ киім жасау идеясы пайда болған кезде, мен осы идеяға қатты қызығушылық таныттым. Себебі бұл жаңалық қана емес, сонымен қатар күнделікті өмірде өте ыңғайлы.
