Қазақстан Республикасының Білім және ғылым министрі Асхат Аймағамбетов студенттер, магистранттар және докторанттар стипендиясы қаншаға өсетінін айтты.
«Нұр Отан» партиясының сайлауалды бағдарламасына сәйкес, 2025 жылға қарай гранттар саны көбейіп, 75 мың орынға жетеді деп жоспарланған. Біз қазірдің өзінде сайлауалды бағдарламаны жүзеге асыруға кірісіп жатырмыз. Тиісті қаражат бөлінді. Биыл қыркүйекте гранттар саны 5 мың орынға көбейтіледі. Егер жыл сайын бакалавриатқа 51 мың орын бөлінетін болса, онда биыл ол 56 мың орынға жетеді», — деді білім министрі халық алдындағы есеп беру кездесуі барысында.
Асхат Аймағамбетов стипендияны көбейту туралы да айтып өтті.
«Мемлекет басшысының тапсырмасына сәйкес стипендиялар көбейтіліп жатыр. Биылғы қыркүйектен бастап бакалавриат стипендиясының мөлшері 30 мың теңгеден сәл асады деп жоспарлап отырмыз. Магистратураға келетін болсақ, онда 15% өсім болады. магистранттарға арналған стипендияның мөлшері 76 мың теңге болады. Биылғы докторантураға біз стипендия мөлшері 172 мың теңгені құрайды деп жоспарлап отырмыз», — деп түсіндірді ҚР Білім және ғылым министрі.
