Павлодар облысының әкімі Әбілқайыр Сқақов өңірде халыққа әлеуметтік көмек көрсету туралы айтып берді.
«1 маусымдағы жағдай бойынша облыстың 17 мыңнан астам тұрғынының жалпы сомасы 700 млн теңгеге мемлекеттік атаулы әлеуметтік көмек алушылар бар. 1,5 мыңға жуық отбасына 19 млн теңгеден астам тұрғын үй көмегі көрсетілді», — деді Әбілқайыр Сқақов ОКҚ брифингінде.
Сонымен қатар, биылғы жылы әлеуметтік көмектің жаңа түрлері енгізіліп, қолданыстағы кейбір төлемдер ұлғайтылды. Атап айтқанда, табысы ең төменгі күнкөріс деңгейінен төмен және АӘК алмайтын аз қамтылған отбасылар үшін өтемақы пайда болды; жалғызілікті және жалғыз тұратын мүгедектігі бар жандар үшін төлем мөлшері және басқалары ұлғайды. Бірқатар атаулы және мерекелік күндерге төлемдер өсті.
«Қайырымдылық шаралары үнемі өткізіліп тұрады. Олар еліміздің Тәуелсіздігінің 30 жылдығында ерекше ауқымға ие болды. Тек республикалық «игі істер марафоны» аясында бүгінгі таңда 5 мыңға жуық іс — шара өтті, облыстың 23 мыңға жуық тұрғыны көмек алды», — деп түйіндеді әкім.
Бұған дейін Павлодар облысында екі жаңа мектеп салынатыны хабарланған болатын.
