2021 жылдың соңына дейін елорда әкімдігі 50-ден астам ұзақ мерзімді үйдің құрылысын аяқтауды жоспарлап отыр. Бұл тағы 7 мың үлескерге кілт беруге мүмкіндік береді, деп хабарлайды қала әкімдігінің сайты.
2019 жылдың жазында Нұр-Сұлтан қаласында 52 проблемалы нысан болған. Сол жылы ұзақ мерзімді 10 проблемалық нысанның құрылыс жұмыстары аяқталды. «2020 жылдың соңына дейін 14 нысандағы 20 үйдің мәселелері шешілді. 2723 үлескер пәтер кілттерін алды.
2021 жылы әкімдіктің уәкілетті ұйымы «Елорда Құрылыс компаниясы» 18 нысандағы 57 үйдің құрылысын аяқтауды жоспарлап отыр, бұл шамамен 7 мың үлескер», — деді «Елорда Құрылыс Компаниясы» ЖШС басқарушы директоры Мақсат Шаяхметов.
Қалған ұзақ мерзімді құрылыстың аяқталуы 2021-2023 жылдарға жоспарланған. Әрбір проблемалық объект бойынша қадамдық іс-қимыл жоспары құрылды.
