Бүгін ҚР Премьер-Министрінің орынбасары Ералы Тоғжановтың төрағалығымен республика аумағында коронавирустық инфекцияның таралуына жол бермеу жөніндегі ВАК отырысы өтті.
Вице-премьер Денсаулық сақтау министрінің және Нұр-Сұлтан, Алматы, Шымкент қалалары, Қарағанды, Атырау облыстары басшылығының өңірлердегі эпидемиологиялық жағдай туралы есебін тыңдап, медициналық ұйымдар мен халықты қажетті дәрілік заттармен және медициналық бұйымдармен толыққанды және үздіксіз қамтамасыз ету бойынша шаралар қабылдауды тапсырды.
Ведомствоаралық комиссия Нұр-Сұлтан, Алматы, Шымкент, Атырау, Қарағанды қалаларында карантиндік шараларды күшейту туралы шешім қабылдады, олар ел бойынша тәуліктік сырқаттанушылықтың 65%-ын және тәуліктік өлімнің 55%-ын құрайды.
Бұл қалаларда 2 тамыздан бастап келесі шектеу шаралары күшіне енеді:
-орталық мемлекеттік органдарды, әкімдіктерді, құқық қорғау органдарын, Денсаулық сақтау ұйымдарын, БАҚ-ты, азық-түлік дүкендерін, дәріханаларды және тіршілікті қамтамасыз ету ұйымдарын қоспағанда, «Ashyq» жобасына қатыспайтын барлық кәсіпорындар мен ұйымдардың қызметін тоқтата тұру; ойын-сауық, спорттық, отбасылық, естелік және өзге де бұқаралық іс-шараларды өткізуге тыйым салу;
-мемлекеттік органдар, кеңселер, ұлттық компаниялар мен өзге де ұйымдар қызметкерлерінің 80% — ын қашықтықтан жұмысқа ауыстыру (вакцинацияланғандарды және соңғы 3 ай ішінде ауырып жазылғандарды қоспағанда).
Сондай-ақ, Ақмола, Алматы, Қарағанды облыстарының әкімдіктеріне Нұр-Сұлтан қалаларымен (Бурабай, Целиноград, Аршалы аудандары), Алматы (Қарасай, Талғар, Іле, Еңбекшіқазақ аудандары), Шымкент (Сайрам, Төлеби аудандары), Қарағанды (Теміртау, Шахтинск, Абай) шекаралас аудандарында карантиндік шараларды күшейту бойынша шаралар қабылдау ұсынылды.
Өңірлердің әкімдіктеріне шектеулер енгізу және олардың сақталуын бақылау бойынша барлық шараларды қабылдау тапсырылды. Вице-премьер коронавирустық инфекцияның таралуына қарсы күресте мониторингтік топтар жұмысының маңыздылығын атап өтті және барлық өңірлерде осы бағыттағы белсенділіктің төмендігін атап өтті.
ШОБ нысандарын рейдтермен қамтудың барынша төмендеуі Ақтөбе, Маңғыстау, Солтүстік Қазақстан, Жамбыл, Қызылорда, Ақмола, Атырау облыстарында, сондай-ақ Алматы және Шымкент қалаларында байқалады. Анықталған бұзушылықтар санының төмендеуі Маңғыстау, Павлодар, Алматы, Солтүстік Қазақстан және Ақтөбе облыстарында байқалады.
Тоғжанов барлық өңірлерде мониторингтік топтардың жұмысын жандандыруды тапсырды. Сондай-ақ, вице-премьер еліміздің кейбір өңірлерінде вакцинацияның төмен қарқынын атап өтті. Мысалы, Маңғыстау облысында халықтың тек 25,6%-ы 1-ші компонентпен егілді, бұл республика бойынша орташа мәннен 2 есе төмен (52,4%).
6 өңірдің (БҚО, Ақтөбе, Қостанай, Қарағанды, Жамбыл, Павлодар облыстары) көрсеткіштері ел бойынша орташа мәннен едәуір артта қалып отыр. Бас мемлекеттік санитарлық дәрігердің 2021 жылғы 14 шілдедегі №32 қаулысына сәйкес қызмет көрсету саласының барлық қызметкерлері 10 тамызға дейінгі мерзімде КОВИД-19 вакцинасының бірінші компонентіне екпе алуы тиіс. Естеріңізге сала кетейік, өткен тәулікте Қазақстанда коронавирустық инфекцияға оң ПТР бар 6797 науқас анықталды. Сонымен қатар, 110 адам қайтыс болды.
