Парижде өтетін 2024 жылғы Олимпиаданы ұйымдастыру комитеті турнирде таныстырылатын спорт түрлерінің тізімін жариялады.
Тізімнен каратэ, бейсбол және софтбол ойындары алынып тасталды. Сонымен бірге бағдарламада тағы бір жаңа спорт түрі пайда болады — брейк -данс. Халықаралық Олимпиада комитеті іс-шараның бағдарламасын, спортшыларға сәйкес квоталарды және Париж 2024 Олимпиада ойындарына жаңа спорт түрлерінің интеграциясын растады. Ұйымдастыру комитеті бағдарламаның түпкілікті екенін және оны өзгертуге болмайтынын айтты.
Дүниежүзілік каратэ федерациясының президенті Антонио Эспиноса өз кезегінде бұл спорт түрі Олимпиада ойындарына тұрақты түрде оралуы керектігін айтты.
«Біз әлемге каратэнің бірегей спорт екенін көрсеттік. Ол арнайы спорттық дайындық пен арнайы техниканы қажет етеді. Біз олимпиадалық қозғалысты ұсына аламыз, себебі ол олимпиадалық құндылықтарға сәйкес келеді», — деді Эспиноса.
Айта кету керек, 2024 жылы 26 шілдеде Париж әлемді үшінші рет Олимпиада ойындарына салтанатты түрде қарсы алады (жарыстар Парижде 1900 және 1924 жылдары болған). Сонымен қатар бұл Франция үшін алтыншы Олимпиада болады: бұл ел қысқы ойындарды үш рет ұйымдастырды: Шамони-1924, Гренобль-1968 және Альбервиль-1992.
Каратэ алғаш рет 2020 жылы Токиода өткен Олимпиада ойындарында ұсынылған болатын. Біздің елдің каратэшілері Дархан Асадилов пен Софья Берулцева Қазақстанға екі қола медаль әкелді.
