«Домбырада ойнауды үйрету» атты жаңа пән мектеп бағдарламасына енгізілмейді.
Домбырада ойнауды үйрету мектептерде жеке пән ретінде енгізілмейді, деп хабарлайды Білім және ғылым министрлігінің баспасөз қызметі.
«Бұл жеке пән туралы емес, 1-6 сыныптарда оқытылатын «Музыка» пәнінің мазмұны туралы. Яғни, қажетті ресурстар болған жағдайда, 6 – сынып оқушылары «Музыка» пәнінің мазмұнындағы екі нұсқаның бірін таңдай алады: қолданыстағы бағдарлама бойынша оқуды немесе домбыра үйрету курсын таңдай алады», — деп нақтылады Ы.Алтынсарин атындағы ұлттық білім академиясында.
Мектептерде домбырада ойнау курсын енгізу туралы Нұр-Сұлтан педагогтарының тамыз кеңесінде айтылды. Осыдан кейін бұқаралық ақпарат құралдарында мектептерде жаңа пән енгізу туралы жаңалықтар пайда болды.
