Астанадағы «Есіл университеті» білім беру мекемесінің қабырғасында жастарға арналған бос жұмыс орындары жәрмеңкесі өтті. Бұл университеттің жылына екі рет өткізілетін іс-шарасын бірлесіп ұйымдастыруға Астана қаласының Жастар саясаты мәселелері басқармасы, «Астана жастары» жастар ресурстық орталығы және қалалық Еңбек ұтқырлығы орталығы қолдау көрсетті, деп хабарлайды елорда әкімдігінің ресми сайты. Жәрмеңкеге 50 қалалық жұмыс берушілер, жұмыс іздеп жүрген 800-ден астам азамат, жоғары оқу орындарының түлектері мен астаналық жастар қатысты. Бос жұмыс орындары жәрмеңкесінің басты мақсаты – жұмыс беруші мен өтініш берушінің тікелей байланысы арқылы жұмыссыз азаматтарды, оқу орындарының түлектерін және жастарды жұмысқа орналастыруға көмектесу. «Астана жастары» жастар ресурстық орталығының NEET жастарымен жұмыс бөлімінің басшысы Сұлтан Өмірғалиев мұндай іс-шараларды өткізу жастарды қолдау саласындағы мемлекеттік саясаттың маңызды бөлігі екенін атап өтті. «Мемлекет басшысы адами капиталды дамыту және жастарды қолдау – еліміз үшін ең маңызды басым бағыт екенін атап өтті. Биыл біз үшінші рет жәрмеңкемізді өткізіп отырмыз. Бұған дейін С.Сейфуллин атындағы Қазақ агротехникалық зерттеу университетінде және «Барыс Арена» ғимаратында жұмыссыздарға арналған үлкен қалалық жәрмеңке ұйымдастырылды. Қазақстан Республикасы Мемлекеттік қызмет істері агенттігінің Астана қаласы бойынша Мемлекеттік қызмет департаментінің басшысы Назгүл Ахметжанованың айтуынша, бүгінде елордада орталық атқарушы органдардың аумақтық департаменттерінде және жергілікті атқарушы органдарда 300-ге жуық бос қызмет орны бар. «Астанада жергілікті атқарушы органдарда 70-тен астам бос жұмыс орны бар, оның ішінде 50-ден астамы ең төменгі басшылық лауазымдар. Бұл бос орындарға жастарды жұмысқа орналастыруға мүмкіндік бар. Өйткені бұл қызмет ешқандай жұмыс тәжірибесін қажет етпейді. Мемлекеттік қызмет алуан сала. Сондықтан кез келген маманның жұмысқа тұруға мүмкіндігі мол. Ең бастысы, әркім өз білімін 2020-2000 жж. Мемлекеттік органдарға жұмысқа орналасу үшін іріктеу кезеңдерін цифрландыру, яғни адам факторын азайту үшін 68 мемлекеттік органды қамтитын https://www.eqyzmet.gov.kz порталы құрылды», — деп түсіндірді Н.Ахметжанова. Жұмыс берушілер қатарында қалалық мекемелер, «ҚТЖ» ҰК АҚ, «Қазпошта» сияқты компаниялар және екінші деңгейлі банктер бар. Жәрмеңке барысында жұмыс берушілер өз кәсіпорындарында бар бос жұмыс орындарын ұсынып, өздеріне ең қолайлы үміткерлер базасын құру мүмкіндігіне ие болды. Өтініш берушілер компанияның HR менеджерлерімен тікелей байланыста болды, сұхбаттардан өтті және өздерін қызықтыратын сұрақтар қойды.
