7000 атыраулық ерекше қажеттіліктері бар балаларға сертификат табысталды.
Білім күні қарсаңында облыс әкімдігінде аймақ басшысы Махамбет Досмұхамбетовтің төрағалығымен «Айналайын» қайырымдылық марафоны өтті. Аталмыш марафон Қазақстан Республикасы Тәуелсіздігінің 30 жылдығына орайластырылды.
Шараға Ғ.Мұратбаев атындағы қалалық орта мектептің инклюзивті сынып оқушылары, олардың мұғалімдері мен аналары, ҮЕҰ өкілдері қатысты.
«Ерекше білім алу қажеттілігі бар балаларға оқуға қажетті жағдайлар жасалуда. Қазіргі таңда инклюзивті білім беруге көп көңіл бөлінуде. Осыған байланысты Атырау облысында арнайы консультациялық және түзету бөлмелері бар, интернаттарда оңалту орталықтары ашылды, ал қарапайым мектептерде жаңа форматтағы инклюзивті сыныптар ашылуда. Ерекше балаларға психологиялық, медициналық, педагогикалық консультациялар беру үшін Атырауда арнайы орталық салу жоспарлануда», — деп облыс әкімі балаларды келе жатқан жаңа оқу жылымен құттықтады.
Аймақ басшысы салтанатты жағдайда әрбір балаға мектеп формасы мен кеңсе тауарларын сатып алу үшін сауда орталықтарына сертификаттар мен сөмкелер тапсырды. Облыста 7000-нан астам бала осындай куәлікке ие болды. Олардың 3000-нан астамы қалада тұрады.
