Павлодар облысында жетім балалар баспана кезегінен шығарылған, арнайы мектеп оқушыларынан тамақ үшін ақы алған, мүгедектігі бар балалар киіммен толық қамтамасыз етілмеген. Өңірдегі мектеп-интернаттар мен арнайы мектептердегі көптеген заң бұзушылықтарды прокурорлар әшкереледі. Нәтижесінде елуге жуық шенеунік әкімшілік және тәртіптік жазаға тартылған.
Павлодар прокурорлары облыстың үш мыңнан астам бала оқитын 18 мектеп-интернаты мен арнайы оқу орындарын тексерді.
«112 оқушыдан мектеп тамағының ақысын заңсыз алу фактілері анықталды, 71 мүмкіндігі шектеулі бала талап етілетін киім-кешекпен қамтамасыз етілмеген. Сонымен қатар оқытушыларды наркологиялық, психодиспансерлерден қажетті анықтамасыз жұмысқа қабылдау, мектепке дейінгі білім беруді сәйкес лицензиясыз жүзеге асыру, санитарлық және өрт қауіпсіздігі нормаларын бұзу фактілері анықталған», — деді Павлодар қалалық қоғамдық мүдделерді қорғау басқармасының басшысы Асхат Қоқымбаев.
Барлық фактілер бойынша прокурорлық ден қою актілері шығарылып, 47 лауазымды тұлға әкімшілік және тәртіптік жауапкершілікке тартылды. Сондай-ақ, қадағалаушыларды тексеру Павлодар облысында жетім балалардың баспана кезегінен негізсіз шығарылғанын көрсетті.
«Екібастұзда тұрғын үйге мұқтаж азаматтарды, оның ішінде толық емес отбасылар, жетім және ата-анасының қамқорлығынсыз қалған азаматтарды баспана тізімінен заңсыз шығарудың 30-ға жуық фактісі анықталды. Уәкілетті органдар баспанаға мұқтаж жандар тізімін жинақтау жұмыстары тиісінше жүргізілмеуде, тізімде меншік құқығында елді мекендерде баспанасы бар адамдар анықталған. Сондай-ақ қалдық құнын нақты төлемей жекешелендірілген тұрғын үйге меншік құқығын рәсімдеу фактілері де аз емес», — деді Қоқымбаев.
