Көкшетауда 28 жастағы қыз мүгедектігі бар ер адамды қайыршылықпен айналысуға мәжбүр етті. Бұл туралы брифингте ІІМ Криминалдық полиция департаменті бастығының орынбасары Қанат Нұрмағамбетов мәлім етті.
«Ақмола облысында 3-топтағы мүгедектігі бар жанды қайыршылықпен айналысуға мәжбүрлеу фактісі анықталды», — деді Қанат Нұрмағамбетов.
Көкшетау қаласының 28 жастағы тұрғынының пайдакүнемдік мақсатта Өскеменнен мүмкіндігі шектеулі 60 жастағы ер адамды алдап алып келгені анықталды.
Осыдан кейін, мамыр айынан бастап қазіргі уақытқа дейін ол күн сайын жұмыс істеп, Орталық нарықта қайыр сұрау үшін сегіз-тоғыз сағатқа қойылды. Алынған табыс өзіне тиесілі болды.
Факт ҚК-нің 126-бабы 3-бөлігі 3-тармағы бойынша СДТБТ-де тіркелді (пайдалану мақсатында бас бостандығынан заңсыз айыру). Тексеру жүргізіледі.
