Елордалық «Жанұя» отбасы институтын қолдау орталығы «Бақытты отбасы» пилоттық жобасымен бірлесіп, қала тұрғындарына мерекелік жиын өткізді, деп хабарлайды Нұр-Сұлтан қаласы әкімдігінің баспасөз қызметі.
Тәуелсіздік мерекесіне орай ұйымдастырылған шараға көп балалы аналар, ерекше күтімді қажет ететін балаларды тәрбиелеп отырған ата-аналар, волонтерлер, қоғам белсенділері мен түрлі салада биік белестерді бағындырған, жетістікке жеткен қыз-келіншектер қатысты.
«Халықтың әлеуметтік жағынан осал топтарындағы әйелдерді қолдау және ынталандыру, мемлекеттің негізі болып табылатын отбасын насихаттау мақсатында бүгін біз мемлекеттік қолдауды қажет ететін елорда тұрғындары үшін арнайы форматта мерекелік жиын ұйымдастырдық. Әр салада жемісті еңбек етіп жүрген қыз-келіншектерге, аналарға қолдау көрсетіп, оларға рухани қуат беру үшін шақырдық», — дейді Жанұя отбасы институтын қолдау орталығының директоры Әсемгүл Садыр.
Бұл орталық қиын өмірлік жағдайға тап болған елорда тұрғындарына көмек көрсетеді.
«Қазір орталықта 28 қызмет түрі көрсетіледі. Осы жұмыс аясында орталық қызметкерлері мемлекеттен жәрдемақы алуға мұқтаж жандарға кеңес беріп, құжаттарын рәсімдеуде көмек көрсетуде. Сондай-ақ, түрлі мемлекеттік органдар мен үкіметтік емес ұйымдардың басшыларымен олардың мәселелерін шешу үшін кездесулер ұйымдастырылады», — деді Нұр-Сұлтан қалалық жұмыспен қамту және халықты әлеуметтік қорғау басқармасы басшысының орынбасары Илья Скуб.
