Азаматтық қызметке қабылданған кезде еріктілер басқа үміткерлерден артықшылық ала алады. Тиісті заң жобасын бірінші оқылымда ҚР Парламенті Мәжілісінің депутаттары қабылдады.
Мұндай норма волонтерлік қызмет, қайырымдылық, Мемлекеттік әлеуметтік тапсырыс және үкіметтік емес ұйымдарға арналған гранттар мәселелері жөніндегі заң жобасына енгізілген. Заң жобасын ҚР Ақпарат және қоғамдық даму министрінің міндетін атқарушы Болат Тілепов таныстырды.
Оның айтуынша, 39 жаңа норма мен қолданыстағы заңдарға 37 өзгеріс енгізу ұсынылады. Заң жобасы үш негізгі блоктан тұрады: волонтерлік қызмет, қайырымдылық және ҮЕҰ-ға мемлекеттік қолдау.
Волонтерлік және қайырымдылық қызметі бойынша қайырымдылық және волонтерлік ұйымдардың мемлекеттік меншік объектілерін жеңілдікпен пайдалануы ұсынылады. Сондай-ақ, мемлекеттік мүлікті волонтерлік және қайырымдылық ұйымдарына сенімгерлік басқаруға беруге қатысты нормалар енгізілді. Қайырымдылықты монетарлық емес ынталандыру шаралары, корпоративтік жауапкершілік аспектілері және жұмысқа орналасу кезінде волонтерлер үшін артықшылық енгізілді.
Заң жобасында Азаматтық қызметке, яғни мемлекеттік мекемелерге, қазыналық кәсіпорындарға жұмысқа қабылдау кезінде конкурстық комиссия кандидаттардың волонтерлік қызметін және волонтерлік тәжірибесі бар кандидаттардың Азаматтық қызметке түсу мүмкіндіктерін ескеретіні көзделген.
ҮЕҰ-ны мемлекеттік қолдау шеңберінде заң жобасымен гранттық қаржыландыру жүйесін қайта форматтау және стратегиялық әріптестікті іске асыруға мемлекеттік тапсырыс түрінде мемлекет пен ҮЕҰ өзара іс-қимылының жаңа тетігін енгізу ұсынылады.
Гранттық қаржыландыруға келетін болсақ, келесі түрлер бойынша аяқталған гранттар жүйесін енгізу қарастырылған: қысқа мерзімді, орта мерзімді және ұзақ мерзімді жобалар. Гранттың түріне байланысты қаржыландыру көлеміне және іске асыру мерзімдеріне, ҮЕҰ үшін конкурсқа қатысу шарттарына қойылатын әртүрлі талаптар және есептілікке қойылатын талаптар айқындалатын болады. Мұндай тәсіл гранттық қаржыландыру рәсімін жеңілдетуге мүмкіндік береді.
