Алматы облысының Сарқан қаласында «Нұрлы жер» бағдарламасы бойынша салынған 50 пәтерлі жалға берілетін үй пайдалануға берілді. Сондай-ақ, балаларға арналған 40 орындық «Сенім» оңалту орталығы ашылды.
Көптен күткен баспанаға кезекте тұрғандардың арасында жетім балалар, I, II топтағы мүгедектігі бар адамдар, ерекше бала тәрбиелеп отырған отбасылар, көп балалы және толық емес отбасылар, ауған ардагерлері, зейнеткерлер, бюджет саласының қызметкерлері, тұрғын үйі авариялық деп танылған отбасылар бар. Бес қабатты тұрғын үйдің құрылысына 505 млн теңгеден астам қаржы жұмсалды. Тұрғын үй барлық заманауи коммуникациялық желілерге қосылған. Балалар ойын алаңы бар, автокөліктерге арналған тұрақ қарастырылған.
«Мен бұл күнді ұзақ күттім. 10 жылға жуық уақыт бойы біз балаларыма ыңғайсыз жалдамалы үйде тұрдық. Енді біз отбасымызбен өз үйіміздің табалдырығын жаңа үмітпен және жақсылыққа деген сеніммен аттаймыз, — деп қуанышымен бөлісті көп балалы ана Перизат Кудиярова.
Сарқан ауданында көп пәтерлі тұрғын үйлердің құрылысы 1991 жылдан бері жүргізілген жоқ. Бұл жұмыс 2020 жылы басталды, келесі жылдың жазының басында тағы бір 20 пәтерлі екі қабатты үй пайдалануға беріледі деп жоспарлануда. Жалпы аудан бойынша 2006-2018 жылдары 3960 шаршы метр тұрғын үй салынды.
Сонымен қатар, Сарқан қаласында мүмкіндігі шектеулі балаларды оңалту бойынша 40 орындық «Сенім» орталығы ашылды. 37,4 млн теңгеден астам сомаға қажетті жабдықтар сатып алынды, оның ішінде 27,7 млн теңгеден астамы мамандандырылған оңалту құралдарына жұмсалды. Бұл «MotoMed» тренажерлері, вертикализатор, «ERGO» құрылғысы, рецикулятор, «Дэльфа-1» тренажер-логопеді және басқалары. Заманауи жабдықтармен жабдықталған 22 кабинетте 55 жоғары білікті мамандар қызмет көрсетеді. Сондай-ақ, орталыққа балаларды тасымалдауға арналған автокөлік бөлінген. Орталықтың ауласы абаттандырылған, балалар ойын алаңдары бар.
«Мұндай орталықтар өте қажет. Ерекше күтімді қажет ететін балаларға мамандандырылған көмек қажет. Мамандармен жұмыс істеу арқылы балалардың денсаулығын жақсарту бойынша жақсы нәтижелерге қол жеткізуге болады. Сарқан ауданында ашылған орталықтың ерекшелігі-мұнда балаларды күні бойы қалдыруға болады. Сондай — ақ, шалғайдағы ауылдардың ата-аналары осы орталықта 6 айға дейін қалып, емделу кезінде балаларымен бірге бола алады», — деп атап өтті облыстық жұмыспен қамтуды үйлестіру және әлеуметтік бағдарламалар басқармасының басшысы Маржан Мұрат.
Орталықта сегіз бағыт, соның ішінде әлеуметтік-медициналық, психологиялық, мәдени, құқықтық бағыттар бойынша қызмет көрсетіледі.
«Біздің қалада оңалту орталығының ашылғанына қуаныштымын. Мен мұнда 11 жасар немеремді әкелдім. Жыл сайын елордаға оңалтуға бардық. Енді осы орталықтың білікті мамандарына жүгіне аламын. Оның денсаулығында оң өзгерістер болады деп үміттенемін», — деді жергілікті тұрғын сәулет Нұрмұхамедқызы.
Орталық орналасқан ғимаратты күрделі жөндеуге 27 млн теңге жұмсалды.
Алматы облысы бойынша барлығы 2231 орынға арналған 14 мекеме жұмыс істейді, олардың барлығы арнайы әлеуметтік қызмет көрсетеді.
