Прокурорлар мүгедектігі бар жандардың құқықтарының сақталуын тексеру аясында 1,8 мыңнан астам заң бұзушылықты анықтады. Олардың 11 мыңнан астамының құқығы қорғалды.
Мәселен, прокурорлық қадағалау шаралары бойынша осы санаттағы адамдарға жұмыс орындарының квотасын көбейту арқылы жеті аудан және қала әкімдігінің қаулылары өзгертілді.
«Қостанай облысында прокуратураның араласуынан кейін психоневрологиялық интернатта тұратын мүгедектігі бар жандарға тиесілі пәтерге үшінші тұлғаның меншігін тану туралы сот шешімі жойылды. Алматы қаласының прокуратурасы «Жанұя» мамандандырылған кешенінің 23 тәрбиеленушісінің мұндай төлемдерге құқық алған сәттен бастап 5-10 жылдан кейін асыраушысынан айырылуы және мүгедектігі бойынша жәрдемақы алғанын анықтады. Қадағалау актісі бойынша кінәлілер есебінен балаларға 10,6 млн теңге өтелді», — делінген хабарламада.
Тағы бір жағдайда Ақтөбе облысының прокурорлары мүмкіндігі шектеулі 40 студентке мемлекеттік шәкіртақы төлеуді қамтамасыз етті.
Жалпы, аталған сала бойынша прокуратураның тексеру қорытындысы бойынша 12 сотқа дейінгі тергеп-тексеру жұмыстары басталды.
«Мәселен, Қызылорда облысында «Әлеуметтік қызмет көрсету орталығының» қызметкерлері қамқорлықсыз қалған қамқорлықтағылардың жеке және биометриялық деректерін пайдалана отырып, ақшасын, зейнетақысы мен жәрдемақысын өздеріне аударған. Аталған факті бойынша облыс прокуратурасы Қылмыстық кодекстің 190-бабы 3-бөлігі 3) тармағы (Алаяқтық) бойынша сотқа дейінгі тергеу амалдарын бастады», — деп хабарлады ведомствоның баспасөз қызметі.
Тексеру қорытындысы бойынша барлығы 336 қадағалау актісі енгізіліп, 130 тұлға тәртіптік, 65-і әкімшілік, 2-і қылмыстық жауапкершілікке тартылды.
Уәкілетті жергілікті атқарушы органдар прокурорлар анықтаған заң бұзушылықтарды жою және азаматтардың бұзылған құқықтарын қалпына келтіру бойынша шаралар қабылдауда.
