Елордада ауыл шаруашылығы жәрмеңкелерінің маусымы басталады. Түркістан облысы алғашқылардың бірі болып Нұр-Сұлтан тұрғындарына өз өнімдерін ұсынып отыр. Жәрмеңке 27-28 тамыз аралығында өтеді.
«Конституция күні қарсаңында біз Қазақстан аймақтарының қатысуымен ауыл шаруашылығы жәрмеңкелерін бастаймыз. Ағымдағы жылдың 27-28 тамызында Түркістан облысының ауыл шаруашылығы тауар өндірушілерінің сапары жоспарланған. Өнімдер орташа бағадан 10-15%-ға төмен бағамен сатылады. 500 тоннадан астам өнім өткізу жоспарлануда. Жәрмеңкеге Түркістан облысының 70 кәсіпкері, тауар өндірушілері қатысады», — деді елордалық инвестициялар және кәсіпкерлікті дамыту басқармасы басшысының орынбасары Қуаныш Сапаров брифингте.
Жәрмеңке Тұран даңғылы, 48 мекенжайы бойынша «Астана Арена» стадионының автотұрағында өтеді.
Түркістан облысының ауыл шаруашылығы басқармасы басшысының орынбасары Нұрбол Бекмұратов 70 кәсіпкер 40 жүк көлігімен өз өнімдерін жеткізгенін атап өтті.
Тауар өндірушілер елордаға 478 миллион теңгенің 500 тоннадан астам өнімін, оның ішінде 165 тонна ет, 100 тоннаға жуық картоп және басқа да көкөністер, сондай-ақ сүт және шұжық өнімдерін әкелді.
Келесі аптада Жамбыл облысында жәрмеңке болса, одан кейін Қызылорда, Алматы, Шығыс Қазақстан, Батыс Қазақстан, Павлодар және басқа облыстар өз өнімдерін әкеледі.
Ауыл шаруашылығы жәрмеңкелері 13 қарашаға дейін жалғасады. Олар сенбі және жексенбі күндері өтеді.
