Қазақстанда ерекше қажеттіліктері бар адамдар үшін омбудсмен пайда болуы мүмкін. Мұндай мекемені құру туралы құжат Ашық НҚА порталында жарияланған, деп хабарлайды ҚазАқпарат тілшісі.
Қаулының мәтінінде уәкілдің негізгі мақсаттары осы Жарлыққа қосымшада көрсетілген халықтың әлеуметтік осал санаттарының құқықтары мен заңды мүдделерінің кепілдіктерін қамтамасыз ету, сондай-ақ олардың құқықтары мен бостандықтарын мемлекеттік және қоғамдық институттармен өзара іс-қимылда қалпына келтіру болып табылатыны көрсетілген.
Негізгі құқықтары мен заңды мүдделерін Халықтың әлеуметтік осал санаттарының құқықтары жөніндегі уәкіл қорғайтын халық санаттарының тізбесіне мыналар кіреді:
Ұлы Отан соғысының ардагерлері;
жеңілдіктер бойынша Ұлы Отан соғысы ардагерлеріне теңестірілгендер, ардагерлер;
басқа мемлекеттердің аумағындағы ұрыс қимылдарының ардагерлері;
мүгедектігі бар жандар;
мүгедектігі бар балалары бар немесе оларды тәрбиелеп отырған отбасылар;
атаулы әлеуметтік көмек алушылар;
асыраушысынан айырылу жағдайы бойынша жәрдемақы алушылар;
жасы бойынша зейнеткерлер;
кандас;
«Алтын алқа», «Күміс алқа» алқаларымен марапатталған немесе бұрын «Батыр ана» атағын алған көп балалы аналар, сондай-ақ I және II дәрежелі «Ана даңқы» ордендерімен марапатталғандар, көп балалы аналар.
Ерекше қажеттіліктері бар адамдардың құқықтары жөніндегі уәкіл институтын құру туралы Қазақстан Республикасының Президенті Қасым-Жомарт Тоқаев Қазақстан халқына Жолдауында бұған дейін айтқан болатын.
«Ең алдымен мемлекет барлығына тең мүмкіндіктер мен әділеттілікті қамтамасыз етеді. Қоғамдық игіліктердің жоғары деңгейіне және халықтың әлеуметтік осал топтарына, оның ішінде ерекше қажеттіліктері бар азаматтарға қолдау көрсетуге кепілдік беріледі. Президент жанында тиісті омбудсмен институты құрылады», — деді Қасым-Жомарт Тоқаев Қазақстан халқына жыл сайынғы Жолдауында.
