Атырауда Іскер әйелдер қауымдастығы 100 жалғызбасты ананы, көп балалы ананы және мүмкіндігі шектеулі балаларды тәрбиелеп отырған жұмыссыз әйелдерді сұранысқа ие мамандықтарға тегін оқыту жобасын жүзеге асырды.
«Жобаға облыстың барлық жеті ауданынан, қала маңындағы Еркінқала, Кеңөзек, Алмалы ауылдық округтерінен, Дамба, Ақсай, Қайыршақты ауылдары мен Атырау қаласынан келген әйелдер қатысты. Теориялық оқудан кейін жобаның 100 қатысушысы «Тігін ісі», «Аспаз», «Кондитер», «Шаштараз» және «Cleaning» мамандықтары бойынша тәжірибелік сабақтардан өтті. Аспаздар мейрамханаларда тәжірибелік дағдыларды меңгерді, тігіншілер тігін ательесінде, кондитерлер кондитерлік цехта, болашақ шаштараздар салонда жұмыс істеді, клинингпен айналысатындар клининг компаниясында кәсіптің қыр-сырымен танысты», — деп хабарлады Іскер әйелдер қауымдастығы.
Жобаға қатысушылар үшін төрт апталық оқыту курстарынан бөлек, «Кәсіпкерлік дағдыларға оқыту», «Контент және SMM – әлеуметтік желілерді дамыту», «Шешендік өнер, көпшілік алдында сөйлеу дағдылары» тақырыптарында екі апталық курстар өткізілді.
«Бизнесті ілгерілету кезеңінде түлектерге 2 ай бойы тәлімгер-куратордың қолдауы көрсетіледі. Оқуды аяқтаған соң 100 түлек құрал-жабдық түріндегі грантқа ие болды. Бүгінгі таңда аспаздық курсты бітірген 4 тігінші, 5 шаштараз, 3 клининг қызметкерлері және аспаздық курстарын бітірген 2 ана тұрақты жұмысқа орналасты. Сондай-ақ 20 әйел өз кәсібін ашып, оны үйде дамытып жатыр», — дейді қауымдастықта.
