26 мамырда Астанада жалпыреспубликалық «Халық заңгері» акциясы басталады. Бұл туралы елорда әкімдігінің ресми сайты ҚР Сыбайлас жемқорлыққа қарсы іс-қимыл агенттігінің Астана қаласы бойынша департаментіне сілтеме жасап хабарлайды.
Акция 26 мамыр күні сағат 17:00-де басталады. Оның мақсаты – халықтың құқықтық сауаттылығын арттыру және тегін заңгерлік көмек көрсету. Кез келген азамат еліміздің заңгерлік қоғамдастығының үздік өкілдерінен қажетті кеңестерін тегін ала алады. Олардың қатарында белгілі адвокаттар, нотариустар, прокурорлар, тергеушілер, сот орындаушылар, мемлекеттік органдардың басшылары, т.б. бар.
Акцияны ұйымдастырушылар – ҚР Сыбайлас жемқорлыққа қарсы іс-қимыл агенттігі, zakon.kz интернет-басылымы, «Параграф» ақпараттық жүйесі, мемлекеттік органдар және Қазақстанның үздік заңгерлері мен адвокаттары.
2016-2022 жылдар аралығында акцияға 7 мыңнан астам үздік сарапшылар мен шешім қабылдаушы деңгейіндегі мемлекеттік органдардың өкілдері қатысты. Заң көмегіне жүгінген 150 мыңнан астам азамат кеңес алды.
Акцияның өтетін орны: Астана қ., Кенесары көш., 32, Е.Рахмадиев атындағы Мемлекеттік академиялық филармония. Кіру тегін.
Іс-шараның ауқымы мен географиясы жағынан акция форматы Қазақстанда ғана емес, әлемде теңдесі жоқ болып табылады.
