Есту қабілеті бұзылған спортшылар арасындағы Қазақстан чемпионатында Қарағанды облысының командасы бірінші орынды жеңіп алды. Облыс намысын 14 таэквондошы қорғады.
Чемпионатқа 85 спортшы қатысты. Олардың арасында Сурдлимпиаданың алты жүлдегері, Әлем және Азия чемпионаттарының жүлдегерлері болды. Жарыс қорытындысы бойынша бірінші орынды Қарағанды облысы, екінші орынды Павлодар облысы, үшінші орынды Шымкент қаласы иеленді.
Жақында Қазақстанның сурдотаэквондо федерациясын қарағандылық спорт қайраткері, жаттықтырушы Руслан Ищанов басқарды.
«Қарағандыда өткен чемпионаттың қорытындысы бойынша ұлттық құрама жасақталады. Ұлттық құрамаға төрт қарағандылық спортшы кіреді. Бүгінге дейін елдегі ең мықты спортшылардың басты мақсаты – Хорватияда өтетін әлем чемпионатында жүлде алу. Жігіттерді жаттықтырамыз, Өскеменде, Түркістан облысында және, әрине, сурдо-таэквондоны дамыту орталығына айналған Қарағандыда жақсы оқу-жаттығу жиындарын өткіземіз. Қарағандылық жұлдыздар Аян Әбдіраш пен Айжамол Әбдіқатова әлем чемпионатында жеңуі тиіс. Біз осы негізгі жарыстарға қарқынды дайындаламыз, бұл үшін бізде барлық жағдай бар», — деді Руслан Ищанов.
