Ақтауда мүмкіндігі шектеулі жандарды тасымалдау үшін 8 орындық шағын автобус пайдалануға берілді, деп хабарлайды Қоғамдық коммуникациялар орталығы қала әкімдігінің баспасөз қызметіне сілтеме жасап.
ЈAC Sunray маркалы 8 орындық шағын автобус І топтағы мүгедектігі бар жандарды, сондай-ақ Ақтау қаласы бойынша еріп жүретін адамдарды тегін тасымалдау қызметін қажет ететін мүгедектігі бар жандарды тегін тасымалдайды.
— Әлеуметтік такси қызметі тегін. Заманауи, соңғы үлгідегі құрал-жабдықтармен жабдықталған көлік мүмкіндігі шектеулі жандардың сұранысына сай қалаішілік бағыттар бойынша тасымалдау қызметін атқарады. Жаңа көлік жергілікті бюджет есебінен алынған. Ақтау қаласы бойынша 5 әлеуметтік таксиге жыл басынан бері 84 мүгедектігі бар жандардан 2427 тапсырыс қабылданып, орындалды. Оның 25-і мүмкіндігі шектеулі балалар», — дейді Ақтау қалалық арнаулы әлеуметтік қызмет көрсету орталығының директоры Жанар Үмбетқалиева.
Ақтау қалалық арнаулы әлеуметтік қызметтер көрсету орталығы әлеуметтік инфрақұрылым объектілеріне тегін тасымалдауды қажет ететін мүгедектігі бар жандарға, сондай-ақ еріп жүретін адамдарға тегін әлеуметтік такси қызметін көрсетеді.
Арбаны пайдаланатын тірек-қозғалыс аппаратында ақаулары бар мүгедектігі бар жандар жол жүрудің жоспарланған күнінен бір күн бұрын ұялы телефондарға: 8 700 430 90 58, ал 1 топтағы мүгедектігі бар жандар (көру қабілеті нашар) 8 700 430 90 59 телефондары немесе 42-94-51 телефоны бойынша арқылы брондау қажет.
Бұл қызметтерді алу үшін мүгедектігі бар жандар келесі құжаттарды ұсынуы тиіс:
1. өтініш (еркін нысанда);
2. жеке басын куәландыратын құжаттың көшірмесі;
3. Қазақстан Республикасы Денсаулық сақтау министрінің міндетін атқарушының 2010 жылғы 23 қарашадағы № 907 бұйрығымен бекітілген 035-1/у нысанындағы медициналық ұйымның қорытындысы;
4. Қазақстан Республикасы Үкіметінің 2005 жылғы 20 шілдедегі № 750 қаулысымен бекітілген Медициналық-әлеуметтік сараптама жүргізу ережесіне сәйкес мүгедектік туралы анықтаманың көшірмесі.
