Жұмыс және педагогикалық тәжірибе колледж және университет білімін қамтиды ма? Бұл сауал Еңбек және халықты әлеуметтік қорғау министрлігінің сайтында қойылған.
Еңбек министрлігіне ҚР Еңбек кодексіне сәйкес еңбек өтілі – қызметкердің еңбек міндеттерін орындауға жұмсаған күнтізбелік есептеудегі уақыты, сондай-ақ еңбек өтіліне енгізілетін өзге де кезеңдер, мысалы, жалақысы сақталмайтын демалыс, оқу демалысы, еңбекке уақытша жарамсыздық кезеңі және т. б.
«Тиісінше, еңбек өтілі дегеніміз — қызметкердің еңбек қызметін жүзеге асыруға жұмсаған уақыт кезеңдерінің жиынтығы (қызметкердің еңбек қызметінен босатылғанға дейінгі барлық кезеңдерінің жиынтығы), сондай-ақ кодекске сәйкес еңбек өтіліне кіретін басқа кезеңдер», — делінген жауапта.
Сонымен қатар, Үкіметтің қаулысына сәйкес мамандық бойынша жұмыс өтілін еңбек өтілін белгілеу жөніндегі комиссия айқындайды, оның құрамын тиісті мемлекеттік органның басшысы бекітеді.
Мамандық бойынша жұмыс өтілін белгілеу туралы комиссияның шешімі хаттамамен ресімделеді. Шешімнен үзінді көшірмелер екі данада дайындалады және беріледі: бір данасы – кадр қызметіне, екіншісі – бухгалтерияға.
Мамандық бойынша еңбек өтілін есептеудің, мамандықтардың сәйкестігін белгілеудің әрбір нақты жағдайы бойынша шешімді еңбек өтілін белгілеу жөніндегі ұйымның комиссиясы да айқындайды.
Бұл ретте, министрлік педагогикалық өтілі білім беру ұйымдары мен ғылыми ұйымдардың қызметкерлері үшін мамандық бойынша еңбек өтілін есептеу қағидаларымен реттелетінін атап өтті.
