Қарағандыда улану салдарынан бір бала қайтыс болып, алтауы жансақтау бөлімінде жатыр.
«Қарағанды облысының балаларға арнаулы әлеуметтік қызмет көрсету орталығында 30 шілдеде екі бала өздерін нашар сезінді. Оларда құсу және сұйық нәжіс болды. Осы мекеменің тағы 10 баласы 31 шілдеде осындай белгілермен ауруханаға түскен. Дәрігерлер қанша тырысқанымен бір баланы аман алып қалу мүмкін болмады. Қазір алты бала жансақтау бөлімінде жатыр. Қалғандары дәрігерлердің бақылауында», — делінген сейсенбідегі хабарламада.
Жергілікті биліктің хабарлауынша, аурухананы облыс әкімі Ермағанбет Бөлекпаев аралап, денсаулық сақтау басқармасының басшылығы мен емдеуші дәрігерлердің қатысуымен жедел кеңес өткізді.
«Болған оқиғаның себептерін анықтау үшін арнайы комиссия құрылды. Қылмыстық іс қозғалды және Қарағанды облысының арнайы прокурорлар басқармасына берілді. Ермағанбет Бөлекпаев тергеу барысында жауапты тұлғалар анықталып, заң аясында жазаланатынын атап өтті. Мекеме директорының міндетін атқарушы қызметінен босатылды », — деп толықтырды облыс әкімдігінде.
