Үкімет қаржылай көмек туралы қаулы қабылдаған жоқ.
Еңбек және халықты әлеуметтік қорғау министрлігі мессенджерлер мен әлеуметтік желілерде коммуналдық қызмет бағасының өсуіне байланысты зейнеткерлерге берілетін субсидиялар туралы тараған ақпаратты жоққа шығарды.
Жалған хабарларда Қазақстан Республикасы Үкіметінің қаулысына сәйкес барлық зейнеткерлерге коммуналдық қызметтер бағасының өсуіне байланысты материалдық көмек көрсетіледі деп жазылған.
«Үкімет субсидияланған қаржылық көмек туралы қаулы қабылдаған жоқ. Бұл ақпарат жалған», — деп хабарлады министрлік.
Олар жергілікті атқарушы органдардың «Тұрғын үй қатынастары туралы» заң шеңберінде жергілікті бюджет қаражаты есебінен аз қамтылған отбасыларға (азаматтарға) жалғыз тұрғын үйді ұстауға арналған шығыстардың жол берілетін шекті деңгейі арасындағы айырманы өтеу үшін тұрғын үй көмегін көрсететінін еске салды. Ол үшін «Тұрғын үй көмегін тағайындау» мемлекеттік көрсетілетін қызмет аясында құжаттарды тапсыру қажет.
