Астанада «Жұлдызай» ұлттық инклюзивті ойындары басталды. Ойынға Қазақстанның барлық аймақтарынан 500-ге жуық ерекше балалар қатысуда. Олар 3 күн бойы жеңіл атлетика, тоғыз құмалақ, үстел теннисі, шағын футбол сынды спорт түрлерінен сайысқа түседі.
Бағдарламаға барлығы 7 спорт түрі кірді. Спартакиада 2018 жылдан бері тұрақты түрде өткізіліп келеді. Ұйымдастырушылар бұл халықаралық Паралимпиада ойындарына әлеуетті қатысушыларды таңдауға көмектесетінін айтады.
Ерлан Сүлейменов, ҚР Ұлттық Паралимпиада комитетінің Бас хатшысы:
— Біз үшін спорт ұйымы ретінде әрқашанда спорттық резервті дайындау өте маңызды болды. Ал олимпиадалық спорт түрлерінде спорт резервін спорт үйірмелеріне баратын қарапайым балалар құраса, аймақтарда мүгедектігі бар балалардың спортпен айналысуы өте қиын. Бейімделетін нысандар аз, үйірмелер мен балалар секциялары да аз, бірақ бәрі де спортпен айналысқысы келеді. Сондықтан бұл балалар ұсынатын спорттық резерв біз үшін жақсы жаңалық.
