Астана қаласында осы демалыс күндері 23 және 24 қыркүйекте Алматы және Жетісу облыстарының ауыл шаруашылық тауар өндірушілерінің жәрмеңкесі өтеді, деп хабарлайды елорда әкімдігінің ресми сайты.
Жәрмеңке сенбі және жексенбі күндері сағат 9.00-ден 18.00-ге дейін Тәуелсіздік даңғылындағы ҚазҰӨИ ғимаратының алдындағы алаңда өтеді.
Екі облыс өкілдері әкелуді жоспарлап отырған өнімнің жалпы көлемі 400 тоннадан асады. Жәрмеңкеде 50-ден астам тауар түрлері – ет, сүт, шұжық, жеміс-жидек пен көкөніс, балық өнімдері, қант, ұн, жарма, өсімдік майлары, бал, ұлттық сусындар және т.б. болады.
Алматы облысының тауар өндірушілерін елордада Қонаев қаласы мен 9 аудан таныстырады. Бұл өңір диқандары Астанаға 186,4 тонна өнім әкелуді жоспарлап отыр.
Жетісу өңірінен Талдықорған мен Текелі қалалары мен 8 аудан қатысады.
Ауыл шаруашылығы тауарын өндірушілер 214 тоннадан астам жүк тасымалдайды.
