2037 жылдан бастап мемлекет «Келешек» ерікті жинақтау жүйесін пайдалануды ұсынып, білім гранттарын беруді тоқтатуды жоспарлап отыр. Жоғары білім министрлігі бағдарлама ата-аналарға ЖОО-да оқуға қажетті соманы өз бетінше жинауға мүмкіндік береді деп санайды.
Бұл бағдарлама бойынша бала 5 жасқа толған кезде мемлекет оның шотына 60 АЕК көлемінде біржолғы бастапқы капиталды салып, оған мемлекеттен ай сайын жеті пайыздық сыйақы есептелетін болады. Банктер де өз комиссияларын алады. Бала 18 жасқа толғанда Ұлттық қордан да қаражат аударылады.
Міндетті шарт: ата-аналар бастапқы капиталды алғаннан кейін баланың 18 жасқа толғанға дейін шотына ай сайын 1-ден 3 АЕК-ке дейінгі жарна салуға міндетті.
Сондай-ақ, ата-ана сақтандыру компаниясы арқылы шот ашатын болса, ата-анасы қайтыс болған немесе мүгедектігі бар жан болған жағдайда балаға білім алу үшін пайдаланылуы мүмкін сақтандыру төлемі берілетінін де қарастырады.
Кейіннен мемлекеттік сыйлықақылар мен инвестициялық кірісті ескере отырып, 18 жасқа дейін жинақ 3,8-ден 6,8 миллион теңгеге дейін болады, деп хабарлады министрлік.
Бұл ретте басқарма жиналған қаржы білім саласына жетпей қалуы мүмкін екенін жоққа шығармайды.
«Егер қаражат жеткіліксіз болса, бала 18 жасқа толғаннан кейін білім алу үшін жеңілдетілген несие алуға және сараланған білім беру грантын пайдалануға мүмкіндік алады», — делінген жоғары және жоғары оқу орнынан кейінгі білім комитетінің хабарламасында.
Егер жүйе қабылданса және ол жұмыс істесе, гранттар 2036 жылға дейін беріле береді, бірақ сараланған.
Дегенмен, «Келешек» жинақтаушы жүйесі жұмыс істей бастауы үшін заңға өзгерістер енгізу қажет. Жоба қазір бюджеттік комиссияның қарауында, мақұлданса, олар арнайы заң жобасын дайындауға кіріседі.
