Қарағанды облысындағы колледждерде ерекше білімді қажет ететін 350-ден астам студент білім алуда. Өңір басшысы Ермағанбет Бөлекпаев аппарат отырысында олардың оқуына қолайлы жағдай жасауды тапсырды.
– Колледждерде инклюзивті және арнайы топтар құрылды. Ерекше білім беру қажеттілігі бар оқушылармен 43 педагог психолог және 2 сурдопедагог жұмыс істейді, 350-ден астам педагог біліктілігін арттыру курстарынан өтті. Ерекше балалар 14 мамандық бойынша оқытылады. Олар арнайы әдебиеттермен, бейімделген бағдарламалармен қамтамасыз етілген», – дейді білім бөлімінің басшысы Гүлсім Қожахметова.
Биылғы оқу жылында колледждердегі ерекше балалар үшін төрт мамандық бойынша 47 грант бөлінді.
Ермағанбет Бөлекпаев еңбек нарығында сұранысқа ие салаларда инклюзивті білім беру және мамандарды даярлау үшін кедергісіз орта құру қажеттігін атап өтті.
– Бүгінгі таңда инклюзивті білім беруді дамыту мәселесі өте өзекті. Ерекше білім беруді қажет ететін студенттердің санын көбейту керек, бұл үшін колледждерде олардың қолайлы білім алуына жағдай жасау қажет, деп баса айтты Ермағанбет Бөлекпаев.
– Бізге де еңбек нарығында сұранысқа ие мамандарды дайындау керек. QazaqGaz ұлттық компаниясының мамандарымен кездестім, олар газдандыру мамандарын даярлауға қызығушылық танытып, дуальді оқыту аясында ынтымақтастыққа дайын екендіктерін білдірген болатын.
Биыл облыста 8144 студент колледждерге түсіп, мемлекеттік тапсырыстың 60 пайызы техникалық мамандықтарға бағытталған. 300-ге жуық кәсіпорынның қатысуымен 42 колледжде дуальды оқыту енгізілді.
Жалпы Қарағанды облысында еңбек нарығында сұранысқа ие мамандықтар тізімі кеңеюде. Соңғы жылдары 16 жаңа мамандық пен 9 біліктілік ашылды. Мәселен, облыста полимер бұйымдарын шығаратын технологтар даярланатын болады.
