2023 жылдың 1 қарашасынан бастап өтемақы мөлшері 0,6 АЕК құрайды.
«Ашық НҚА» сайтында коммуналдық қызмет тарифтерінің көтерілуіне байланысты мұқтаж азаматтардың жекелеген санаттарына әлеуметтік көмек көлемін арттыру туралы Алматы қаласы мәслихатының шешімінің жобасы жарияланды.
Осылайша, құжатқа сәйкес, 2023 жылдың 1 қарашасынан бастап электр энергиясы тарифінің көтерілуіне байланысты өтемақы мөлшері 0,5 АЕК (1 725 теңге)-ден 0,6 АЕК (2 070 теңге) дейін көтеріледі. Әлеуметтік көмек көрсету мерзімін 2024 жылдың 30 маусымына дейін ұзарту жоспарлануда. Сонымен қатар, жоба өтініш берушінің құжаттарын оның әлеуметтік көмекке мұқтаждығы туралы қорытынды дайындау үшін учаскелік комиссияға жіберуді болдырмайды, өйткені әлеуметтік көмек жан басына шаққандағы орташа табысты есепке алмағанда халықтың әлеуметтік осал топтардың сегіз санатына ғана көрсетіледі.
Тарифтердің көтерілуінің орнын толтыруға арналған әлеуметтік көмек өтініш бойынша төленеді. Құжаттарды қабылдау және төлеуді қала әкімінің аудандық аппараттары екінші деңгейлі банктер арқылы өтініш берушілердің есеп шоттарына жүргізеді.
«Жоба халықтың әлеуметтік осал топтарын мемлекет тарапынан қосымша әлеуметтік қорғау шараларымен қамтамасыз етуге, сондай-ақ қала аумағында Коммуналдық қызметтерге тарифтерді көтеру кезінде ауыртпалықсыз көшуге мүмкіндік береді. 1 қарашадағы жағдай бойынша 120 000– нан астам адам әлеуметтік көмек алды», — делінген құжаттағы түсіндірме жазбада.
Жоба қабылданған жағдайда 2023 жылдың соңына дейін қала бюджетінен қосымша қаражат бөлу талап етілмейтіні атап өтілді. 2024 жылға қаржыландыру 4,1 млрд теңгені құрайды (қамту – 315 430 адам).
Төлемді халықтың әлеуметтік осал топтарының сегіз санаты ала алады:
ҰОС ардагерлері;
жеңілдіктер бойынша ҰОС ардагерлеріне тең басқа мемлекеттердің аумағындағы ұрыс қимылдарының ардагерлері;
бірінші және екінші топтағы мүгедектігі бар жандар;
мүгедектігі бар балалары бар немесе оларды тәрбиелеп отырған отбасылар;
«Алтын алқа», «Күміс алқа» алқаларымен марапатталған көп балалы аналар;
көп балалы отбасылар;
мемлекеттiк немесе қоғамдық мiндеттерiн, әскери қызметiн орындау кезiнде, ғарыш кеңiстiгiне ұшуды дайындау немесе жүзеге асыру кезiнде, адам өмiрiн құтқару кезiнде, құқықтық тәртiптi сақтау кезiнде қаза тапқан (қайтыс болған) адамдардың отбасылары;
жасы бойынша зейнеткерлер.
