Елордадағы Beeline Arena спорт кешенінде паракаратэден инклюзивті әлем чемпионатының ашылу салтанаты өтті, деп хабарлайды елорда әкімдігінің ресми сайты.
Іс-шараның ашылу салтанатына қатысқан Астана қаласы Дене шынықтыру және спорт басқармасының басшысы Самат Жылқыбаев қатысушыларға сәттілік тілеп, Қазақстанда алғаш рет өткізіліп отырған мұндай әлемдік жарыстарға ерекше мұқтаж спорт саласында инклюзивті орта құрудың маңыздылығын атап өтті.
«Мемлекет басшысы Қасым-Жомарт Кемелұлы Тоқаев ерекше қажеттіліктері бар азаматтарды қолдау мәселелеріне үнемі үлкен көңіл бөледі.
Паралимпиада спорты ең алдымен рухы биік, мақсаты айқын жандарға арналғаны сөзсіз. Соңғы жылдары елімізде бұл саланың қарқынды дамып келе жатқаны қуантады.
Күні кеше ғана Қытайдың Ханчжоу қаласында өткен IV Азия Паралимпиада ойындары еліміз үшін сәтті өтті.
Расында да, ел өз тарихында жүлделердің саны мен сапасы бойынша барлық рекордтарды жаңартты. Сонымен қатар дзюдо, жеңіл атлетика, пауэрлифтинг сияқты спорт түрлерінен Қазақстан тұңғыш рет алтын медаль жеңіп алды», — деді ол.
Спорттық жарыстың жүлде ұтысына сегіз елден 200-ге жуық спортшы қатысуда.
Ұйымдастырушылардың айтуынша, қатысушылардың жасы 7 мен 65 жас аралығында.
Қатысушылар – тірек-қозғалыс аппараты, көру мүшесі зақымданған, сондай-ақ интеллектуалдық даму деңгейі төмен спортшылар, сондай-ақ дені сау спортшылар да бар.
Айта кетейік, жарыс 26 қарашаға дейін Beeline Arena спорт кешенінде жалғасады.
