Қазақстандық емделушілер үшін мамандандырылған, оның ішінде жоғары технологиялық медициналық көмек алу мүмкіндіктерінің өрісі жыл сайын кеңейіп келеді.
Міндетті медициналық сақтандыру жүйесінің енгізілуімен көптеген күрделі, қымбат араласулар барлық сақтандырылған азаматтарға қолжетімді болды.
Елімізде трансплантология, кардиохирургия, онкология, инновациялық жасушалық технологиялар саласында 80 жаңа технология енгізіліп, олардың көмегімен 20 мыңға жуық адам емделді.
Мысалы, Ұлттық нейрохирургия орталығында ашылған сәттен бастап Гамма-пышақ аппаратымен 1133 ота, 2023 жылы 233 ота жасалды. Қалқанша безінің обыры кезінде радиоиодтерапиямен 1300-ден астам науқас емделді. Сүйек онкопатологиясы кезінде инновациялық 3-Д протездеу енгізілді, осындай 15 ота жасалды
Бейне эндоскопиялық аппаратураның көмегімен химиотерапиямен бірге 30 мыңға жуық онкологиялық операция жасалды. Жыл сайын 12 мыңнан астам науқас сәулелік терапияны (томотерапия, стереотаксис, IMRT, IGRT) алады.
Дәрігерлер есту қабілеті бұзылған адамдарға электромагниттік есту аппараттарын тегін имплантациялады. Осындай 428 отаның әрқайсысының құны орта есеппен 6,6 млн теңгені құрайды, оны МӘМС қорлары өтейді.
2011 жылдан бері кардиохирургиялық орталықта 492 жасанды сол жақ қарынша имплантациясы, 2023 жылы 40-тан астам ота жасалды.
259 ағза трансплантациясы жасалды, 400 балаға гемопоэтикалық дің жасушалары ауыстырылды, оның 66-сы 2023 жылы.
Республикада 79 инсульт орталығы бар, олар 38 мыңнан астам адамға көмек көрсетті. Жедел коронарлы синдром бойынша ел тұрғындарына мамандандырылған медициналық көмекті 44 коронарлы интервенция орталықтары көрсетеді, онда 33 мың науқас емделді.
Жалпы, өткен жылы стационарларда мамандандырылған, оның ішінде жоғары технологиялық медициналық көмекке қолжетімділіктің артуы 3 миллионға жуық науқастың ем алуына және өмір сүру сапасын жақсартуға мүмкіндік берді.
Биыл Астанада протон орталығы бар (Орталық Азиядағы бірінші) Ұлттық онкологиялық орталықтың құрылысы аяқталуда.
Онкологиялық қызметті жаңғыртудың Кешенді жоспары аясында 5 онкологиялық диспансердің құрылысы басталып, жұмыс істеп тұрған 2 нысанды қайта жаңғырту және 6 нысанды күрделі жөндеу жұмыстары жүргізілуде.
Инсульт, инфаркт жағдайында білікті жедел көмек көрсету үшін республикада тағы 6 II деңгейдегі инсульт орталығы және 4 ТКА-орталық ашылады. Сондай-ақ уақтылы көмек көрсету үшін бірыңғай консультациялық инсульт орталығын іске қосу жоспарлануда.
Ана мен бала денсаулығын сақтау қызметін дамыту тұжырымдамасында аналар мен балаларға медициналық көмек көрсету үшін 12 заманауи перинаталдық орталық, өңірлерде 11 көп бейінді балалар стационарын салу, еліміздің 5 өңірінде «Пренаталдық диагностикаға арналған бір күндік клиника» пилоттық жобасын іске қосу көзделген.
