Сондай-ақ, демалыс кезінде бір мектептен екінші мектепке ауысуға шектеу алынып тасталды.
Бірінші сыныпқа баратын балалардың құжат қабылдау мерзімі 31 тамызға дейін ұзартылды.
Ата-аналар мен қоғамның өтініші бойынша Оқу-ағарту министрлігі өзгерістер енгізгені атап өтілген.
«Егер бұрын бірінші сыныпқа қабылдау 1 сәуір мен 1 тамыз аралығында жүзеге асырылса, енді ата-анасынан немесе баланың басқа да заңды өкілдерінен бірінші сыныпқа құжаттарды қабылдау ағымдағы күнтізбелік жылдың 1 сәуірінен 31 тамызына дейін жүргізіледі», — делінген хабарламада.
Бір мектептен екінші мектепке тек демалыс кезінде ауысуға шектеу де алынып тасталды. Жаңа ережеге сәйкес, балаларды оқу жылы ішінде тұрғылықты жері бойынша мектептен мектепке ауыстыруға болады.
«Техникалық және кәсіптік білім беру ұйымдарына оқуға қабылдау мерзімі 25 тамызда аяқталуына байланысты оныншы сынып оқушыларының өтініштерін қабылдау мерзімі 15 тамыздан 31 тамызға өзгертілді. Колледжге қабылданбаған оқушылар мектептің 10-11-сыныптарында оқуын кедергісіз жалғастыруға мүмкіндік алды», — деп қорытындылады ведомствода.
