2024 жылдың басынан бері елорданың мансап орталығына 9 713 жас өтініш білдірді. Оларды жұмысқа орналастыруға жәрдемдесу жөніндегі шаралар туралы Астана қаласының Еңбек ұтқырлығы орталығының директоры Олжас Омар елорданың Коммуникациялар қызметінде өткен брифингте айтып берді, деп хабарлайды қала әкімдігінің ресми сайты.
Мәселен, ағымдағы жылдың бірінші тоқсанында орталықта Жұмыспен қамту шараларымен 2013 адам қамтылды, оның 271-і тұрақты жұмыс орнына орналастырылды.
Субсидияланатын жұмыс орындарына 961 жас жіберілді, оның 221-і «Жастар практикасы» бағдарламасы шеңберінде мемлекеттен қолдау алды, 62-сі «Алғашқы жұмыс», 87 — әлеуметтік жұмыс орындарына, 591 — қоғамдық жұмыстарға орналыстырылған.
«Алғашқы жұмыс» жобасы аясында бірінші рет жұмыс іздеп жүрген жұмыссыздар қажетті еңбек дағдыларын игеру үшін бос жұмыс орындарын таңдайды.
Бағдарлама бойынша кепілдендірілген жалақы – 30 АЕК (110 760 теңге), жұмыс кезеңі – 18 айдан аспайды – еңбек өтіліне есептеледі, бұл ретте аяқтағаннан кейін штатқа жұмысқа орналасады.
35 жастан аспаған, жұмыс тәжірибесі жоқ азамат қатысушы бола алады.
Сондай-ақ, орталық өз мамандығы бойынша алғашқы жұмыс тәжірибесін алу үшін колледждер мен жоғары оқу орындарының түлектеріне арналған «Жастар тәжірибесі» бағдарламасын жүзеге асырады. Осы санат бойынша жұмысқа орналасуға қойылатын талаптар:
• оқуды аяқтағаннан кейін 5 жыл ішінде (университет немесе колледж);
• мамандығы бойынша жұмыс тәжірибесінің болмауы;
• жасы 35-тен жоғары емес;
Еңбек жағдайлары:
• кепілдендірілген жалақы – 30 АЕК (110 760 теңге);
• тәжірибе мерзімі еңбек өтіліне есептеледі;
• аяқтағаннан кейін – штатқа жұмысқа орналасу мүмкіндігі;
• ұзақтығы 12 айдан аспайды.
Орталық жүзеге асыратын тағы бір бағдарлама – «Ұрпақтар келісімшарты». Ол оқу орындарының түлектерін жұмысқа орналастыруға, содан кейін зейнеткерлік жасқа толған жұмыскерді ауыстыруға арналған.
Оған үш жыл бұрын жоғары оқу орнын немесе колледжді бітірген 35 жастан аспаған азаматтар да қатыса алады.
Кепілдендірілген жалақы – 30 АЕК (110 760 теңге), практика кезеңі еңбек өтіліне есептеледі, аяқтағаннан кейін штатқа жұмысқа орналасу жүргізіледі. Жұмыс ұзақтығы 6 айдан аспайды.
«Сондай-ақ, кәсіпкерлік белсенділікті арттыруға бағытталған іс-шаралар шеңберінде электрондық еңбек биржасы арқылы 263 және «Бастау Бизнес» бойынша кәсіпкерлік негіздері бойынша 518 жас онлайн-оқытудан өтті. 2023 жылдан бастап жастарға жеңілдікпен кредит беру бағдарламасы іске асырылуда. Микрокредит беру 21 жастан 35 жасқа дейінгі жас кәсіпкерлерді қолдауға бағытталған. Бағдарламаға жұмыс істейтін жастардың өкілдері қатыса алады. Қарыз сомасы: 5 миллион теңгеге дейін, сыйақы мөлшерлемесі: жылдық 2,5%. Қарыз мерзімі 5 жылға дейін, мал шаруашылығын дамыту үшін – 7 жылға дейін. Өтінім берген сәтте жеке кәсіпкер ретінде тіркелу мерзімі 5 жылдан аспауы тиіс», — деді Олжас Омар.
Несие берудің міндетті шарты кепілмен қамтамасыз етудің болуы болып саналады. Кепіл ретінде жылжымалы (мамандандырылған техника) және жылжымайтын мүлік қабылданады. Мұндай болмаған жағдайда кепіл берушіні (ата-аналарын, туыстарын және т.б.) тартуға болады.
Микрокредит мерзімінің ұзақтығының үштен біріне дейінгі негізгі борыш пен сыйақыны өтеу бойынша жеңілдікті кезең көзделген.
Қажетті құжаттар тізімі: жеке басын куәландыратын құжат; жоба бойынша бизнес-жоспар; шоттың болуы туралы қызмет көрсететін банктен анықтамалар; қаржы ұйымдарынан (кредиттер болған кезде) кредиттік берешектің, оның ішінде мерзімі өткен берешектің болуы туралы анықтамалар;қатысушының/үміткердің жалақысын және (немесе) өзге де табыстарын растайтын құжат (жинақтаушы зейнетақы қорынан үзінді көшірме) болған кезде; кепілді қамтамасыз ету ретінде берілетін мүлікті бағалау туралы есеп; кепіл беруші және кепілмен қамтамасыз ету жөніндегі құжаттар.
Құжаттарды қабылдауды «Аграрлық несие корпорациясы» АҚ жүзеге асырады. Мекенжайы: Астана қаласы, Тұран даңғылы 19/2.
«Жастардың жаңа бизнес-идеяларын жүзеге асыру үшін гранттар алуға ерекше назар аударғым келеді. Business.enbek.kz порталында 2024 жылғы 8 сәуірден бастап 1 ағын бойынша жаңа бизнес-идеяларды іске асыру үшін гранттар алуға өтінімдер қабылдау басталады. Гранттар қайтарымсыз негізде беріледі, нысаналы мақсаты жаңа бизнесті бастау және дамыту болып саналады. Грант көлемі 400 АЕК-ні (1 476 800 теңге) құрайды. Әр қатысушы оны тек бір рет ала алады. Грант қаражаты ісін жаңа бастаған кәсіпкерлерге өздерінің бизнес-әлеуетін ашуға, өндірісті жолға қоюға және дамытуға, сол арқылы өзін тұрақты табыспен қамтамасыз етуге мүмкіндік береді», — деді спикер.
Өтініш беру үшін:
• порталда тіркелу;
• грант алу шарттарына сәйкестігін тексеруден өту;
• бизнес-жоспар шаблонын жүктеп алу, оны толтырыңыз және порталға жүктеңіз;
• өтініш нысанын толтырып, ЭЦҚ кілтімен қол қою.
Интернетке немесе компьютерге қолжетімділік болмаған жағдайда, мансап орталықтарының өзіне-өзі қызмет көрсету аймақтарында, Халыққа қызмет көрсету орталықтарында өтініш беруге болады.
Грант алу үшін бірқатар шартты сақтау қажет. Жаңа бизнес-идеяны іске асыруға грант алуға үміткерлер:
• тіркелген жұмыссыздар;
• жеке кәсіпкерлер (тіркеу мерзімі 3 жылға дейін).
Бұл ретте үміткер мынадай әлеуметтік санаттардың біріне жатуға тиіс:
• мүгедектігі бар адамдар;
• «қандас» мәртебесі бар тұлғалар;
• аймақаралық қоныс аударушылар;
• аз қамтылған отбасы мүшелері;
• көп балалы отбасының мүшесі (жұбайы/зайыбы);
• мүгедектігі бар баланы тәрбиелеп отырған адам (жұбайы/зайыбы);
• асыраушысынан айрылу бойынша жәрдемақы алушылар.
Үміткерде 3 жылдан аспайтын мерзіммен «Бастау Бизнес» жобасы бойынша кәсіпкерлік негіздеріне оқыту туралы сертификаты болуы тиіс.
Рәсімдердің ашықтығын, адами факторды төмендетуді, өтініш берушілердің ыңғайлылығын қамтамасыз ету үшін гранттар берудің барлық процесі электрондық форматқа ауыстырылды. Грант алуға өтінімдерді қабылдау Business.enbek.kz бірыңғай терезе-портал арқылы жүзеге асырылады. Грантты: қажетті құрал-саймандарды, еңбек құралдарын, технологиялық жабдықтарды, жануарларды, малды, құсты, көшеттерді, бұталарды, тұқымдарды, көшеттерді сатып алу, үй-жайларды жалға алу ақысын төлеу арқылы алуға болады.
Гранттар: тұтыну мақсаттарына, несиелік қарыздарды өтеуге, тұрғын үй жылжымайтын мүлігін сатып алуға және салуға, жер учаскелерін сатып алуға, акцизделетін өнім өндіруге берілмейді.
