Әр түрлі дәрі-дәрмектерді арнайы жәшіктерде қалдыруға болады.
Алматыда мерзімі өтіп кеткен дәрілерді қабылдау науқаны басталды.
Акцияның мақсаты – тұрғындар арасында жарамдылық мерзімі өтіп кеткен дәрілерді дұрыс кәдеге жарату және олардың қоршаған ортаға тигізетін әсері туралы ақпараттандыру.
«Мерзімі өтіп кеткен дәрі-дәрмектерді үйінде сақтайтын тұрғындар қоршаған ортаның ықтимал ластануына жол бермей, оларды қауіпсіз түрде тастай алады. Ыңғайлы болу үшін әр емханада мерзімі өтіп кеткен дәрілерді жинайтын арнайы жәшіктер орнатылды», — делінген әкімдік хабарламасында.
Қораптарда дәрі-дәрмектің әртүрлі түрлері, соның ішінде таблеткалар, капсулалар, сұйықтықтар, ампулалар және басқа да пішіндер қабылданатыны атап өтілді. Маскалар, қолғаптар мен шприцтер, пайдаланылған таңғыштар қабылданбайды.
Арнайы жәшіктер орналасқан емханалардың мекенжайларын қала әкімдігінің сайтынан білуге болады.
