Жамбыл облысында тұрғын үй қорындағы 20 пәтердің бірде-біреуі жетім балаларға берілмеген
Жамбыл облысының прокурорлары Мерке ауданы әкімдігінде жетім балалардың тұрғын үй құқықтарын бұзу фактілерін анықтаған.
Облыстық қадағалау органының баспасөз қызметі хабарлағандай, Мерке ауданының прокуратурасы уәкілетті органның мемлекеттік тұрғын үй қорынан оны алуға басым құқығы бар тұлғалар арасында тұрғын үйді бөлу кезінде заң бұзушылықтарға жол бергенін анықтады.
«2022 жылы аудан әкімдігі тұрғын үй қорынан 20 пәтер сатып алған, бірақ жетім балаларға бірде-бір пәтер берілмеген. Осылайша жетім балалар мемлекет кепілдік берген кезекке тұру құқығынан және баспана алу мүмкіндігінен де айырылған», — деп түсіндірді ведомствода.
Прокурорлық қадағалау актісімен үш бала тұрғын үй кезегіне қайта қойылды, төрт балаға құқық белгілейтін құжаттар ресімделіп, тұрғын үй қорынан пәтер берілген.
