Елордалық паралимпиадашылар Әли Тұрғанбеков пен Ерсұлтан Наметуллаев елге оралды. Спортшыларды отбасылары мен достары, мүмкіндігі шектеулі жандарға арналған «Елорда» спорт клубының қызметкерлері қарсы алды, деп хабарлайды қала әкімдігінің ресми сайты.
3-10 маусым аралығында Францияның Лимож қаласында суда паражүзудің әлемдік сериясы өтті. Жарысқа 37 елден 200-ден астам спортшы қатысты. Ұлттық құрама сапында Әли Тұрғанбеков 2 орынды, Ерсұлтан Наметуллаев 3 орынды иеленді. Бұл жас спортшылар арасындағы тұңғыш халықаралық жарыс.
«Бұл менің бірінші халықаралық жарысым. Үлкен толқу болды. Ұлттық құрама бапкерлері мен команда мүшелерінің қолдауы оң нәтиже берді. Ерсұлтан екеуміз үшін Дүниежүзілік паражүзу сериясы үлкен тәжірибе болды. Қолдау көрсетіп, жылы қарсы алғандарыңызға рахмет», — деді Әли Тұрғанбеков.
