«Таза Қазақстан»: Астанада «Табиғатты аялайық» экологиялық жәрмеңкесі өтті
Астанада «Таза Қазақстан» ауқымды экологиялық акциясы аясында қала әкімдігі жанындағы белсенді ұзақ өмір сүру орталықтары «Аялайық табиғат» экологиялық жәрмеңкесін өткізді, деп хабарлайды елорда әкімдігінің ресми сайты.
Мұндай жәрмеңке қалада алғаш рет өткізіліп отыр. Астана күнін мерекелеу аясында өтіп жатқан эко-шараға белсенді ұзақ өмір сүру орталықтарының суретшілері мен қолөнершілері қатысты. Олар өз қолдарымен жасаған бұйымдарды сатылымға шығарды.
«Бұл шараның мақсаты – қала тазалығын сақтау және қоршаған ортаны қорғау. Экологиялық жәрмеңкеде қалдық заттардан қайта өңдеп жасалған бұйымдар келушілер назарына ұсынылды. Бұл бұйымдарды біздің орталықтың ата-әжелері өз қолдарымен жасаған. Мәселен, жұмыртқаның науасынан панельдер, пластик бөтелкелерден фонарьлар, газеттерден себеттер жасап, оларды қайта өңдеп, пайдалану маңызды екенін үйретеді», — дейді Астана қаласы әкімдігінің Белсенді ұзақ өмір сүру орталығы Алматы ауданы бойынша әлеуметтік қызмет көрсету бөлімінің басшысы Динара Зәкір.
Ұйымдастырушылардың айтуынша, түскен қаражат қайырымдылыққа жұмсалады.
Жәрмеңкедегі ең маңызды қондырғылардың бірі эко-стильде қайта өңделген материалдармен безендірілген «Өмір ағашы» болды.
Сондай-ақ шара барысында концерттік бағдарлама мен флешмоб ұйымдастырылды.
