Астана әкімі Жеңіс Қасымбек Instagram желісіндегі парақшасында «ÓzgeEpic» алғашқы ірі шығармашылық хабының ашылғанын хабарлады.
«Елордада алғашқы ірі шығармашылық хаб («Мирный дом» тұрғын үй кешенінде орналасқан) ашылды. «ÓzgeEpic» хабына бірегей этно-музей мен қолөнер шеберханасы кіреді. Мұнда қонақтарға заманауи арт-перформанс, музыкалық және әдеби кештер үшін трансформер зал, сондай-ақ заманауи өнер галереясы, театр алаңы және ұлттық ойындардың смарт аймағы ұсынылады. Сондай-ақ, хаб аумағында қазақстандық баспалардың өнімдерін сатуға арналған кітап дүкені бар.
Мемлекет басшысы креативті экономика ірі қалаларды дамытудың қозғаушы күші, талантты, шығармашыл адамдарды тартатынын атап өтті.
Астанадағы шығармашылық хабтың мақсаты – бәсекеге қабілетті заманауи өнерді дамыту және қоғамның мәдени санасын арттыру, сондай-ақ дарынды және интеллектуалды жастарды қолдау және тәлімгерлік ету. Хаб креативті нарыққа жүздеген мамандарды қосуға ықпал етеді», — деді елорда әкімі.
