Қазақстанда мүгедектігі бар азаматтар ұйымдарынан сатып алынатын тауарлардың тізімі бекітілді
Еңбек министрлігінің 2024 жылғы 3 қыркүйектегі бұйрығымен «Мүгедектігі бар азаматтар қоғамдық бірлестіктерінен және (немесе) Республика мүгедектігі бар азаматтарының қоғамдық бірлестіктері құратын ұйымдардан сатып алынатын тауарлардың, жұмыстардың, көрсетілетін қызметтердің жекелеген түрлерінің тізбесін» бекіткен болатын.
«Мемлекеттік сатып алу туралы» Заңның 27-бабының 2-тармағына сәйкес тапсырыс беруші, ұйымдастырушы, бірыңғай ұйымдастырушы тауарлардың, жұмыстардың, көрсетілетін қызметтердің жекелеген түрлерін мемлекеттік сатып алуды жүзеге асыру кезінде тауарлардың кемінде 50 пайызын және жұмыстардың 100 пайызын Қазақстан Республикасындағы мүгедектігі бар азаматтардың қоғамдық бiрлестiктерiнен және (немесе) мүгедектігі бар азаматтардың қоғамдық бiрлестiктерi құрған ұйымдардан ағымдағы жылы осы тауарларды сатып алуға бөлінген қаражаттың жалпы сомасынан көрсетілетін қызметтер сатып алады.
Еңбек министрлігі осындай тауарлардың, жұмыстардың және қызметтердің тізбесін бекітті, оған келесілер кіреді:
Өндіріс тауарлары:
• төсек-орынның барлық түрлері, көрпелер, матрацтар, төсек жапқыштар, жастықтар, сүлгілер, майлықтар, төсек жаймалары, матрацтар, жаялықтар;
• шалбар, оқшауланған комбинезон, оқшауланған жилет, камуфляжды далалық күрте;
• дәнекерлеуші костюмі, аккумулятор операторының костюмі, жұмыс комбинезондары;
• аспаз костюмі, наубайшы костюмі, қалпақ;
• халаттар, алжапқыштар, сигналдық жилет, хирургиялық костюмдер, мақтадан жасалған аяқ киімдер;
• пижамалар, ерлер іш киімі, аяққа арналған шылғаулар, жейделер, көйлектер;
• орамал, жаға, қолғап;
• перделер, қалқалар, сөмкелер;
• байланыстырғыштар, конверттер, қағаз папкалар, сызғыштар;
• қаптама және мұрағаттық жәшіктер;
• ағаш бұйымдар;
• жиһаз.
Өндірілетін және (немесе) жеткізілетін өнімдер:
• тифлотехникалық құралдар;
• арнайы көлік құралдары;
• міндетті гигиеналық құралдар.
Орындалатын жұмыстар:
• көгалдандыру.
Көрсетілетін қызметтер:
• мүгедектігі бар азаматтарға арналған көліктерді жөндеу және техникалық қызмет көрсету;
• мүгедектігі бар азаматтарды сауықтыру және санаториялық-курорттық емделуін ұйымдастыру;
• үй-жайлар мен аумақтарды жинау, тазалау қызметтері;
• көгалдандыру, абаттандыру;
• баспа қызметтері;
• кір жуу қызметтері.
Бұйрық 2025 жылдың 1 қаңтарынан бастап күшіне енеді.
