Қазақстанда Инклюзивті саясат тұжырымдамасы жүзеге асырылуда. Құжат алдағы бес жылға есептелген.
Негізгі жаңалық – әлеуметтік және құқық қорғау моделіне көшу.
Ол ерекше қажеттіліктері бар адамдардың мүмкіндіктерін кеңейтуді және толық әлеуметтік интеграцияны қамтиды. Елімізде жұмыс орындарына квота бөлу, қолжетімді ортаны дамыту, оңалту орталықтарын салу жалғасады.
Сондай-ақ олар көлік қызметін, оның ішінде мүгедектігі бар жандарға арналған таксилерді көрсету тетіктерін қарастырады. Барлығы 13 негізгі бағыт бар. Еңбек және халықты әлеуметтік қорғау вице-министрі Асқарбек Ертаев қаңтар айынан бастап әлеуметтік қызмет көрсететін ұйымдарды лицензиялау енгізіліп, әлеуметтік қызметкерлер аттестациядан өтіп жатқанын хабарлады.
Асқарбек Ертаев, Қазақстан Республикасы Еңбек және халықты әлеуметтік қорғау вице-министрі:
– Өздеріңіз білетіндей, арнаулы әлеуметтік қызметтердің сапасын арттыру мақсатында 2025 жылдың 1 қаңтарынан бастап осындай қызметтерді көрсететін барлық субъектілерді, меншік нысанына қарамастан лицензиялау енгізілген болатын. Биылдан бастап халықты әлеуметтік қорғау саласындағы әлеуметтік қызметкерлерді аттестациялаудың жаңа тәсілдері қаралып, енгізіледі. Жүйелеу және есепке алу үшін әлеуметтік қызметкерлердің арнайы тізілімі құрылды. 12 мыңнан астам әлеуметтік қызметкердің 11 600-і оқытылды.
