Атырауда нысандардың мүмкіндігі шектеулі жандар үшін қол жетімділігі тексерілмек
Атырауда нысандардың мүмкіндігі шектеулі жандар үшін қолжетімділігі тексерілетін болады. Арнайы мониторинг тобы мемлекеттік мекемелерді, дүкендер мен қызмет көрсету саласының ғимараттарын аралауда.
Қолайсыз пандустар, арнайы көтергіштер мен лифттердің жоқтығы, тар есіктер – мүмкіндігі шектеулі жандардың түйткілді мәселелерінің бір бөлігі ғана.
Атырау тұрғыны Жасұлан Қабдолов осыдан сегіз жыл бұрын жол апатына ұшыраған. Содан бері ол мүгедектік арбасын пайдаланады. Оның айтуынша қаланың барлық нысандарында жүріп-тұру мүмкіндігі шектеулі жандарға жағдай жасалмаған.
Жасұлан Қабдолов, Атырау қаласының тұрғыны:
— Мысалы былтыр тұрмыстық техника дүкеніне бара алмай қалдым. Көбінесе ғимараттардың алдындағы пандустар талаптарға сай келмейді — оларға көтерілу мүмкін емес. Бұл нысанның мүмкіндігі шектеулі адамдар үшін қолжетімділігін шектейді. Бұлай болмауы керек. Қозғалыстағы шектеулер әртүрлі жерлерде кездеседі.
Бір топ мүгедектігі бар азаматтардың бастамасымен жүргізілген рейд барысында біз ірі сауда орталығында болдық. Дүкендегі пандус талапқа сай емес, арнайы лифт де жоқ. Рейдке қатысушылар жүк лифті арқылы екінші қабатқа көтерілді.
Есболат Балбаев, Атырау қаласының тұрғыны:
— Мүмкіндігі шектеулі жандар неге үйде отыруы керек? Неліктен олар дүкендерге өз бетінше барып, өздеріне қажет нәрсені таңдай алмайды? Қала ортасы қолжетімді және жайлы болуы керек. Бұл екі мыңға жуық адамға қатысты мәселе. Облыстық мәслихатта қоршаған ортаның қолжетімділігі мәселесі үнемі көтеріліп келеді, бірақ әлі нәтиже жоқ, дейді депутат Гүлназ Қосмурзиева. Ол сондай-ақ нысандардағы заң бұзушылықтар туралы тұрғындардың өздері арыз жазуы керек дегенмен келіспейді.
Гүлназ Қосмурзиева, облыстық мәслихаттың депутаты:
— Мемлекет бізге арыз, шағым жазыңыздар дейді. Неліктен шағым жазуымыз керек? Мен мұны түсінбеймін. Пайдалануға тапсырған кезде әрбір ғимарат толық қолжетімді болуы керек. Мемлекеттік органдар нысан талаптарға сай болмаса, қабылдауға қол қоймауы керек. Профилактикалық бақылау үшін қалалық жұмыспен қамту және әлеуметтік бағдарламалар бөлімі жанынан мониторингтік топ құрылды. Оның мүшелері объектілердің заң талаптарына сәйкестігін тексереді. Егер анықталған бұзушылықтар белгіленген мерзімде түзетілмесе, айыппұл салынады. Өткен жылы 145 нысан әкімшіліктерінен ескерту алған.
Рафхат Жолдиев, қалалық жұмыспен қамту және әлеуметтік бағдарламалар бөлімінің басшысы:
— 2021-2022 жылдарға дейін қабылданған нысандар бар. Олардың кейбіреулері мүмкіндігі шектеулі жандарға қолжетімді орта жасау шарттарына сай емес. Біз қазір мұндай нысандарды қадағалап, кемшіліктерді жою жөнінде ұйғарым шығарып жатырмыз. Биыл қалада 245 нысан тексерілуі тиіс. Ескертулерді елемеушілерге жазалау шаралары қолданылады. Қала тұрғындары да қоғамдық бақылауды күшейтпекші. Олар апта сайын рейд өткізуді жоспарлап отыр.
