18-20 ақпан аралығында Астананың сауда-ойын-сауық орталықтарында Anti-fraud киберқылмыстың алдын алу бойынша іс-шаралар өтуде. Акцияны елордалық полиция департаменті ұйымдастырды, деп хабарлайды қала әкімдігінің ресми сайты.
Полиция қызметкерлері халықты киберқылмыс түрлерімен таныстырып, олардың қаржылық сауаттылығын арттыру мақсатында түсіндірме жүргізеді.
Сарапшылар құрылғы қауіпсіздігін үнемі жаңартып отырудың, сенімдірек құпия сөздерді пайдаланудың және қорғалмаған интернет желілеріне қосылу кезінде абай болудың маңыздылығын атап өтті.
Астананың полиция департаменті еріктілерді тарта отырып, алаяқтардан сақтандыратын кітапшаларды тарату бойынша түсіндіру жүргізіп жатыр.
«Жедел-іздестіру іс-шаралары барысында 5 алаяқтық схема, сондай-ақ бұрын жасалған 10 қылмыс ашылды. Алдын алу мақсатында ескерту материалдарын жаппай тарату ұйымдастырылды. Қала көшелерінде үгіт-насихат жұмыстары жүргізілуде. Науқанға волонтерлар, блогерлер, БАҚ өкілдері мен танымал тұлғалар қатысты», — деп атап өтті киберқылмыспен күрес басқармасының бастығы, полиция подполковнигі Талғат Бөлегенов.
Сондай-ақ ол алаяқтық схемалардың жиі кездесетін түрлерін атады.
«Ең көп кездесетіндер: банктердің, құқық қорғау органдарының, Ұлттық қауіпсіздік комитетінің, ұялы байланыс операторларының қауіпсіздік қызметі мамандарының атынан қоңыраулар. Олар сондай-ақ WhatsApp мессенджерінің аккаунттарын бұзады, содан кейін жәбірленушінің атынан қарызға ақша беруді өтінетін хабарламалар жібере бастайды. OLX.kz, Satu.kz сауда алаңдары арқылы тауар немесе қызмет сататындар алаяқтардың көзіне жиі түседі. Мұнда алаяқтар көбінесе тауар үшін аванстық төлемді аударуды немесе оны жеткізу сілтемесін орындауды сұрайды. Instagram, TikTok әлеуметтік желілері арқылы тауарларды сату алаяқтардың сүйікті орны екенін атап өткім келеді. Әдетте, аккаунттардың жалған нұсқалары ашылады, онда олар тауардың толық құнын төлеуді сұрайды. Алаяқтар жұртты криптовалюта мен бағалы қағаздарға инвестициялауға да жиі тартады», – деп ескертті Талғат Бөлегенов.
Ол алаяқтардан зардап шеккен жандарға тез арада полицияға хабарласуды ұсынады.
