Алғыс айту күніне орай Астана қаласы Қазақстан халқы Ассамблеясы «Шарапат» әлеуметтік қызмет көрсету орталығында қайырымдылық акциясын өткізді, деп хабарлайды елорда әкімдігінің ресми сайты.
Шараның мақсаты – Алғыс айту күнін мерекелеу аясында қарттар мен мүмкіндігі шектеулі жандарға қамқорлық көрсету.
«Алғыс айту күні еліміздің тарихындағы бір-біріне құрмет көрсетіп, жылы қарым-қатынас орнататын маңызды күнге айналды. Бұл күн қоғамдағы достық пен келісімді нығайтуға септігін тигізбек.
Сондықтан бүгінгі шараның ауқымы кең екенін атап өтуге болады. «Бүгінгі концерттік бағдарлама осы орталықтағы түрлі этнос өкілдеріне деген құрметті білдіріп, жағымды көңіл-күй сыйлады деп айта аламыз», — дейді шараны ұйымдастырушылардың бірі Арман Жәниев.
Сондай-ақ, мерекелік іс-шара барысында аталған мекемедегі 300-ден астам жалғызбасты қарт пен ерекше қажеттіліктері бар жандарға концерттік бағдарлама ұсынылып, азық-түлік себеттері таратылды.
