Астанада Сұлтанбек Орынбасаровты еске алуға арналған бочча турнирінің финалы өтті
Фото Н.Байбулин
Жақсылық Үшкемпіров атындағы Жекпе-жек сарайында тұңғыш жаттықтырушы Сұлтанбек Орынбасаровты еске алуға арналған боччадан жыл сайынғы ашық республикалық турнирдің финалы өтті. Салтанатты шараға Парламент Сенатының Төрағасы, Қазақстан Бочча федерациясының президенті Мәулен Әшімбаев қатысты.
Спортшыларды қарсы ала отырып, Мәулен Әшімбаев боччадан бірінші жаттықтырушы – Сұлтанбек Орынбасаровтың елеулі үлесін атап өтті, ол бір кездері даму ерекшеліктері бар балалардың әлеуетін көріп, олар үшін спорт пен жетістіктер әлеміне жолдама жұлдызы бола алды. Жыл сайын бочча қауымдастығына қосылуға, турнирлер мен спартакиадаларға қатысуға ниет білдірушілердің саны артып келеді, сондай-ақ ата-аналардың қызығушылығы мен федерацияның барлық өңірлерде ашылып жатқан филиалдары осы спорт түріне деген сұраныстың айқын дәлелі болып табылады.
Бұл ретте Мәулен Әшімбаев Мемлекет басшысы басым назар аударып отырған инклюзивті қоғамды одан әрі құрудың маңыздылығын атап өтті.
«Ел Президенті Қасым-Жомарт Кемелұлы Тоқаев әр азаматқа тең мүмкіндіктерге ие қоғам құрудың маңыздылығын үнемі атап өтеді. Бүгінгі турнир ерекше және қоғамымызда инклюзия мәдениетін таратуда көп еңбек сіңірген азаматқа арналған. Сұлтанбектің арқасында Қазақстанда бочча дами бастады және бүгінде бұл қозғалыстың қандай жақсы нәтижелерге қол жеткізіп жатқанын көріп отырмыз. Бочча — бұл тек пара-спорт емес, бұл мәдениет, инклюзивті қозғалыс және дұрыс құндылықтар жүйесін тарату тәсілі. Бұл ерекше қажеттіліктері бар балалар үшін ересек өмірге бейімделу үшін маңызды және қажетті әлеуметтендіру құралы».
Мәулен Әшімбаев турнирді өткізген ата-аналарға, жаттықтырушылар мен ұйымдастырушыларға алғысын білдірді
Турнир бағдарламасына жеке жарыстардан басқа командалық және жұптық жарыстар енгізілді. Оның басты мақсаты – елдегі ең үздік бочча ойыншыларын анықтау және қоғам назарын инклюзивті қоғам құру және мүгедектігі бар жандар үшін тең құқықтар мен мүмкіндіктер құру шараларына аудару.
Турнир қорытындысы бойынша командалық есепте бірінші орынды Астана қаласы мен Жетісу облысының құрама командасы (Асқарбеков Қуаныш, Батханов Аманай, Тілебалды Меруерт) бөлісті. Сондай-ақ екінші орын елордалық командаға (Алмат Ерхат, Шайдурова Виктория, Уразбек Мейірбек), үшінші орын Батыс Қазақстан облысының спортшыларына (Арыстанғалиева Гүлсезім, Өтеғалиева Назерке, Нұрберген Наурызбек) бұйырды.
ВС3 сыныбы бойынша жұптық сайыста бірінші орынды Жамбыл облысы мен Астана қаласының құрама командасы иеленсе, екінші орынды Астана қаласы, үшінші орынды Жамбыл облысы мен Жетісу құрамасы бөлісті.
ВС4 сыныбы бойынша жұптық сайыста Жетісу облысының спортшылары (Мұратқан Мадияр, Мұхаметқан Айым) жеңімпаз атанса, екінші орынды Маңғыстау облысының жұптық командасы (Теңгелгенов Тәттімбет, Танысбаева Айгерім), үшінші орынды Жамбыл облысының командасы (Балланзева, Беханбанов) иеленді.
Айта кетейік, 5-10 наурыз аралығында елордалық «Аспан» спорт кешені мен Жақсылық Үшкемпіров атындағы Жекпе-жек сарайында боччадан ашық республикалық турнир өтті. Оған 130 спортшы қатысты. Бұл өткен жылмен салыстырғанда екі есеге жуық көп. Спортшылар Астана, Алматы және Шымкент қалаларын қоса алғанда, еліміздің 14 өңірінен, сондай-ақ Қарағанды, Атырау, Павлодар, Маңғыстау, Жамбыл облыстарынан, сондай-ақ Жетісу және Абай облыстарынан қатысты.
Турнирді Астана қаласы әкімдігінің қолдауымен Қазақстандық бочча Федерациясы, ERG компаниялар тобы және басқа да серіктестер мен демеушілер ұйымдастырды.
