Қазақстанда кімдер онкологиялық тексеруден тегін өте алады
Қазақстан азаматтары онкологиялық скринингтік тексеруден тегін өтеді. Мұндай тексерулер пациенттің тіркелген жері бойынша алғашқы медициналық-санитарлық көмек ұйымдарында жүргізіледі. Денсаулық сақтау министрлігі түсіндіргендей, онкологиялық скринингтен тегін өтуге құқығы бар: • сүт безі обырын ерте анықтау үшін: 40, 42, 44, 46, 48, 50, 52, 54, 56, 58, 60, 62, 64, 66, 68, 68, 70 жасқа толмаған қатерлі ісікпен ауырмаған әйелдер. • жатыр мойны обырын ерте анықтау үшін: жатыр мойнының қатерлі ісіктері бойынша динамикалық бақылаудан өтпейтін 30, 34, 38, 42, 46, 50, 54, 58, 62, 66, 70 жастағы әйелдер. • тоқ ішек обырын ерте анықтау үшін: тоқ ішектің қатерсіз және қатерлі ісіктері бойынша динамикалық бақылаудан өтпейтін 50, 52, 54, 56, 58, 60, 62, 64, 66, 68, 70 жастағы ерлер мен әйелдер.
Мұндай тексерулер онкологиялық аурулардың жоғарыда аталған түрлері бойынша динамикалық бақылауда тұрмайтын және міндетті әлеуметтік медициналық сақтандыру жүйесінде сақтандырылған азаматтарға жүргізіледі. Скринингтен өту қажеттілігі туралы ақпарат пациентке алғашқы медициналық-санитарлық көмек ұйымдарынан қоңыраулар мен SMS хабарламалар арқылы жіберіледі.
Сонымен қатар мамандар азаматтардың үйлеріне барып, хабардар етуде.
— Скрининг аясында ауруды диагностикалау диагнозды морфологиялық тексеру деңгейіне дейін жүргізіледі, одан кейін аурудың таралу дәрежесін анықтау үшін қосымша зерттеулер қажет. Қатерлі ісікке дейінгі жағдайлар анықталса, науқас онкологпен кеңесе алады. Қазіргі таңда облыстық онкологиялық орталықтардың базасында сараптамалық эндоскопиялық орталықтар құрылды. Олар тоқ ішек обырына скринингтен өтіп жатқан науқастар арасында диагностикалық эндоскопиялық тексерулер жүргізіп қана қоймай, оңалту және динамикалық бақылауды қамтамасыз етеді, деп хабарлады Денсаулық сақтау министрлігі. Айта кету керек, қазір скринингтік тексеру міндетті әлеуметтік медициналық сақтандыру (МӘМС) жүйесі есебінен қаржыландырылады. Ведомство өкілдері онкологиялық скринингті халыққа тегін көрсетілетін медициналық қызметтердің қатарына енгізу жоспарда барын хабарлады.
Заңнама қабылданса, міндетті медициналық сақтандыру жүйесінде сақтандырылмаған азаматтар үшін мұндай тексеру түрлері тегін жүргізілетін болады.
